Dita

“Shkodra në Festë”, shkruan kryetarja e Bashkisë së Shkodrës Voltana Ademi në faqen zyrtare të kësaj bashkie.

Dhe bëhet fjalë mes dyzimit mes festës dhe protestës. Por shkodranët sot kanë të drejtë të festojnë. Jo vetëm me pankartat e varura në shtyllat e qytetit, por me dhjetëra aktivitete që mungojnë edhe për shkak të organizimit të protestës së opozitës. Klubi I futbollit “Vllaznia” sot ka ditëlindjen, plot 1 shekull, 100 vjet.

Pjesa intelektuale e qytetit është dekurajuar nga mungesa e një programi veprimtarish të bashkisë që ka në mbikqyrje këtë klub futbolli. Edhe pse një klub legjendar si Vllaznia është në kategori të parë këtë sezon, emrat e dalë nga futbolli shkodran lënë gjurmët e pashlyera në kujtesën e Shqiptarëve.

Pasdite, bashkia pretendon të organizojë një ekspozitë, në orën 18.00 me foto dhe libra e dokumentare për 100 vjetorin e Vllaznisë, por kjo nuk mjafton. Duhet të ishte mirëmenduar një kalendar veprimtarishë, me thirrjen e legjendave dhe organizime ndeshjesh futbolli ndoshta, për një prej klubeve më me emër në Shqipëri.