Meta President në vitin 2017? “Ekziston mundësia për këdo që është 40 vjeç dhe ka ambicie”

Publikuar tek: politike, më 07:31 12-02-2016 Meta President në vitin 2017? “Ekziston mundësia për këdo që është 40 vjeç dhe ka ambicie”

Kreu i Kuvendit Meta i është përgjigjur në emisionin e Ylli Rakipit “Të paekspozuarit” pyetjes nëse duhet të jetë pikërisht ai Presidenti i Shqipërisë në vitin 2017. Meta nuk e ka përjashtuar si mundësi duke thënë:

Së pari, ne e kemi një President dhe unë kam shumë konsideratë për të. Kjo mundësi ekziston për cilindo, që ka moshën 40- vjeç dhe ka një ambicie të merret me politikë.

Për Ilir Metën nuk ka qenë dhe nuk është e rëndësishme se çfarë është sot, apo çfarë do të jetë në vitin 2017 apo në vitin 2018. Më e rëndësishme është që kudo që të jetë, të shërbejë që qytetarëve tanë t’u realizohen sa më shumë pritshmëritë që ata kanë ndaj klasës politike”.

INTERVISTA E PLOTË

Analistët thonë se ju keni qenë një udhëheqës liberal në fillimet tuaja dhe gradualisht shihet një pamje klienteliste më shumë sesa liberale. Ju duke qenë si njeriu garant i qeverisjeve, sidomos në 10 vjetët e fundit, e keni parë korrektimin si forcim të pozitave tuaja? Analistët vëzhgojnë që e keni parë si forcim të pozitave tuaja dhe jo si mbrojtës i interesave të qytetarëve...

Nuk ka asnjë shqetësim. Unë i pranoj dhe i mirëpres të gjitha pyetjet, madje edhe po të mos i kisha dëgjuar ato pyetje që në momentin kur ju nxorët dy kolegët tuaj, mund t’ua kisha formuluar unë thelbin e pyetjeve të tyre. Në fund të fundit, unë vazhdoj të jem liberal, sepse respektoj çdo mendim dhe opinion.

Ju mendoni se analistët janë të njëanshëm?

Kam frikë se janë edhe më shumë se të njëanshëm në kuptimin e njëanshmërisë sesi e shohin Lëvizjen Socialiste për Integrim, sepse dëgjova pak më parë përsëri me kokëfortësi një shpjegim, që LSI-ja ka qenë kundër ngritjes së Byrosë së Hetimit në Policinë e Shtetit. Kam dëgjuar vazhdimisht këto ditë një absurditet, një gjë fare qesharake, madje kam dëgjuar edhe një budallallëk të madh, sikur LSI-ja votoi për ngritjen e Byrosë së Hetimit para pak ditësh në qeveri, sepse ka qenë kundër ngaqë do të vijë Sekretari i Shtetit, z. John Kerry, në Tiranë ditën e diel.

Në fakt, ai vjen për arsye të tjera...

Nuk ka rëndësi. Më fal, por janë të njëjtët analistë, pak a shumë, që frymëzojnë në mënyrë të vazhdueshme një diversion që nuk ekziston realisht si një marrëdhënie mosbesimi apo si kundërvënie ndaj reformave, sepse LSI-ja e ka votuar ngritjen e Byrosë Kombëtare të Hetimit bashkë me Partinë Socialiste. Më pas e rrëzoi Gjykata Kushtetuese si të papajtueshme me parimet e Kushtetutës, por LSI-ja ka qenë gjithnjë e hapur për t’u ngritur kjo agjenci dhe çdo agjenci tjetër. Mjafton të respektohen parimet e Kushtetutës dhe mjafton njëkohësisht të garantojë efikasitet në kryerjen e misionit për të cilën kjo agjenci apo çdo agjenci tjetër krijohet. Pra, ka një tendencë fare të njëanshme për të dëmtuar, do të thosha, atë fizionomi mjaft pozitive që sjell LSI-ja në politikën shqiptare: një mesazh gjithmonë stabilizues për politikën, që e orienton atë drejt zgjidhjeve, që e orienton atë drejt moderimit të konfliktit, me qëllim për ta ftohur politikën dhe për ta bërë më racionale që të japë zgjidhje dhe jo të shtojë problemet.

Absolutisht, LSI-ja gjithmonë ka mbrojtur interesin publik, edhe kur ka qenë e detyruar të bëjë koalicion me Partinë Demokratike në vitin 2009. Mendoj se e ka mbrojtur interesin publik, sepse nuk kishte një zgjidhje tjetër që mund të garantonte stabilitet në vend dhe në drejtim të reformave. Edhe kur ka bërë koalicion me Partinë Socialiste ka ndihmuar, që nga dita e parë e krijimit të saj, që politika në Shqipëri të mos shihet bardhë e zi. Përmes lëvizjes së saj politike LSI-ja ka ndihmuar për të kryer disa procese në mënyrën më europiane të mundshme. Kuptohet brenda standardeve tona, sikurse kanë qenë edhe rotacionet e vazhdueshme, ku sjellja e LSI-së ka qenë mjaft e moralshme, siç ishte edhe përfundimi i mandatit me Partinë Demokratike, dalja në opozitë. Sepse harrohet ky moment, në mënyrë mjaft luajale, që nuk ka ndodhur asnjëherë në jetën politike shqiptare dhe vajtja drejt votuesve për t’u gjykuar për një koalicion të ri.

Së dyti, LSI-ja ka parë interesin publik, por asnjëherë nuk ka qenë një parti grindavece në koalicion, asnjëherë nuk ka bërë presione të pandershme. Për shembull, në rastin me Partinë Demokratike, kur ka qenë momenti që është vënë në diskutim raporti i Shqipërisë me NATO-n, LSI-ja e ka bërë të qartë që jo vetëm nuk do të votonte një ligj të pakonsultuar me NATO-n, por do të rishikonte edhe koalicionin me Partinë Demokratike. Edhe për shumë çështje të karakterit ekonomik, social për reforma të ndryshme, LSI-ja gjithmonë ka pasur mendimin e saj, por, natyrisht, ata të cilët dëshirojnë që LSI-ja në çdo moment të prodhojë një konflikt dhe pastaj të thonë: ja LSI-ja është një forcë konfliktuale, është një forcë problematike e të tjera.

Natyrisht që LSI-ja është parë edhe me këtë sy që thoni ju...

Ne jemi në një vend ku e respektojmë mendimin e ndryshëm, por objektiviteti mendoj që i nderon të gjithë.

Ne kemi 3 vjet qeverisje, z. Meta, tani viti i fundit është vit elektoral. Vështirë të gjesh në këto 3 vjet, një njeri me shumë eksperiencë, ish-Kryeministër i vendit, një ekonomist me eksperiencat nga më të mëdhatë në këto 25 vjet në Shqipëri, vështirë të gjesh në këto 3 vjet prononcim për këtë qeverisje. Këto 3 vjet çfarë janë për ekonominë? Jo vetëm partia, e kam fjalën për lidershipin...

Më fal, dëgjova që për shëndetësinë nuk ka folur. Petrit Vasili sa herë ka folur në Komisionin e Shëndetësisë? Z. Vangjel Tavo sa herë ka folur në Komisionin e Shëndetësisë? Për çështjet e sigurisë sa herë ka folur z. Braho? Sa herë ka folur z. Luan Rama për çështjet e sigurisë, përveçse qëndrimeve të mia të herëpashershme. Por, zakonisht, këtu edhe analistët kanë dëshirë të mbajnë mend vetëm ato gjëra që u pëlqejnë atyre për t’i përdorur. Është normale dhe unë e respektoj edhe këtë gjë.

Z. Meta, njëlloj si tek telenovelat që shfaqin dendur televizionet shqiptare, politikën shqiptare e ka pushtuar ideja e reformës në drejtësi. Duket sikur një gjë e madhe po zbret nga lart dhe shqiptarët tani pas 25 vjetësh do të shpëtojnë. Çfarë është kjo gjendje që po kalon politika, por edhe një pjesë e rëndësishme e të huajve në Shqipëri, përfshi ambasadoren e BE dhe ambasadorin e SHBA-së? Vërtet duhet të besojmë tani se pas 25 vjetësh diçka e madhe do të ndodhë me ne?

Është e drejta juaj për të ndërtuar të gjithë regjinë e emisionit tuaj dhe unë e respektoj këtë. Kjo tregon që unë vazhdoj të mbetem mjaft liberal.

Së dyti, jam i habitur, sepse dëgjova edhe në komentin tuaj, edhe në pyetjet e kolegëve tuaj, kam dëgjuar edhe sot në Parlament, kam dëgjuar edhe më përpara pse po zvarritet reforma në drejtësi? Çfarë po ndodh? Pse nuk po bëhet? Të gjitha më duken normale, sepse reforma në drejtësi po ecën me ritmin e parashikuar që kur e nisi...

Duket sikur diçka e madhe do të ndodhë...

Më fal, por patjetër që do të ndodhë. Nuk do të ndodhë brenda natës duhet të jemi realistë.

Ju jeni një politikan shumë i vështirë për të komunikuar. Në Shqipëri jeni nga politikanët më të vështirë, z. Meta, për të komunikuar. Ju mbeteni rob i disa klisheve të rëndësishme dhe dilni pa thënë ndonjë gjë...

Unë nuk kam lidhje me klishetë. Kur është thënë që reforma në drejtësi do të mbarojë në janar, po flasim për ndryshimet, kjo gjë gjithmonë është thënë. Gjithmonë ka qenë një kalendar, i cili është respektuar dhe mund të ketë lëvizur maksimumi dy javë dhe asgjë më shumë. Është një reformë shumë e rëndësishme, është një rithemelim i të gjithë sistemit të drejtësisë. Nuk është diçka e thjeshtë, pra që do të thotë se kjo do të ketë një ndikim në të gjithë jetën institucionale...

Kush do ta bëjë këtë rithemelim, z. Meta?

Të gjithë bashkë.

Këta që e themeluan, këta që kemi?

Tani, këta që e themeluan!? Edhe Komisioni i Venecias e bëri këtë...

Përveç faktorëve të huaj, që neve na ndihmojnë me asistencë sociale, se..

Bashkë me mediat, me ju, se edhe ju jeni pjesë e kësaj me komentet tuaja, me mendimet tuaja. Të gjithë bashkë. Unë mendoj se të gjithë duhet të jemi të përgjegjshëm, sepse edhe ju dëgjoheni.

Atëherë, ju mendoni se tani në Shqipëri ata që themeluan 25 vjet këtë sistem drejtësie që ne kemi, e rrëzojnë dhe themelojnë një tjetër, apo jo? Përfshirë këtu edhe ju, jo totalisht...

Po, mirë dakord, kush do ta bëjë atëherë?

Unë nuk e di, po ju pyes juve....

Do të sjellim disa të tjerë nga marsi? Ju lutem!

Ambasadorët po e bëjnë...

Po, patjetër, edhe ata janë të përfshirë. Kur flasim për partnerët ndërkombëtarë, nuk flasim thjesht për ambasadorët, ata shprehin një vullnet politik, flasim për EURALIUS-in, që është misioni i Bashkimit Europian, i specializuar. Ne duam të hyjmë në Bashkimin Europian, duam të përmirësojmë sistemin tonë të drejtësisë, sipas atyre standardeve, që të jetë një sistem shumë më efektiv sesa sot, edhe në drejtim të luftës kundër korrupsionit, edhe kundër krimit, edhe të integritetit të vetë sistemit, që është dëmtuar, për fat të keq, gjatë këtyre dy dekadave. Kjo është arsyeja pse po ndodh gjithë ky rithemelim i sistemit të drejtësisë.

Që ta bëjmë më të thjeshtë për publikun, z. Meta. Arsyetimi juaj është shumë i drejtë, është disi teorik. Ta bëjmë më konkret: marrim një ligj tjetër, që është aprovuar, shumë i rëndësishëm, e hodhi opozita në fillim, në fakt, ajo e hodhi për t’u kthyer në parlament, por...

Dekriminalizimin?

Tani u bë ky ligj. Do të dekriminalizohet jeta politike dhe institucionale e vendit, përfshirë këtu institucionet më të rëndësishme të vendit? Si mund të bëhet kjo, pyes unë si gazetar, z. Meta? Pra, nuk bëhet fjalë për Lazaratin apo një kooperativë bujqësore, është inkriminuar Parlamenti. Kush e inkriminoi atë? A mban përgjegjësi ai që e ka inkriminuar?

Ka dy gjëra: së pari, të mos harrojmë se edhe para se të bëhej ligji për dekriminalizimin, vetë angazhimi për ta realizuar atë, qoftë edhe presioni ndërkombëtar, që ka një kontribut të veçantë, por edhe presioni mbi të cilin u vu e gjithë politika, për shkak edhe të opinionit publik, edhe të medieve, për shkak të ngjarjeve të papëlqyeshme që ndodhën në parlament, të mos harrojmë se mjaft veprime kanë ndodhur që atëherë, mjaft dorëheqje kanë ndodhur nga Kuvendi, njëkohësisht, ky ligj është miratuar dhe pritet të hyjë plotësisht në fuqi në fillim të muajit tjetër. Pra, në këtë drejtim mendohet se ka pasur një progres, jo vetëm kaq dhe ky ligj do të japë një efekt shumë pozitiv për të ardhmen.

Më falni, nuk mund të themi që nuk është një arritje. Patjetër që kemi përgjegjësi për ato gjëra që anë ndodhur.

Ju jeni një njeri që në vitin 2008 u rreshtuat, bëtë grevë për një gjë, që të gjithë pushtetin e morën kryetarët partive. Tani ata, pas kësaj kohe, morën dhe futën në Parlament çfarë deshën deri sot. Futën në Parlament njerëz me rekorde kriminale. Të ndalojmë konkretisht: a ka përgjegjës?

Patjetër që ka përgjegjës. Unë jam dakord që ka përgjegjësi dhe po e fus edhe veten time si pjesë e kësaj përgjegjësie të politikës, prandaj është reflektuar, prandaj është bërë ligji. Nuk e ka asnjë vend tjetër këtë ligj.

Po nuk e ka, se nuk ka kriminelë në Parlament...

Nuk është ashtu.

Po si është?

Nuk dua të rri dhe të përmend raste të vendeve të tjera. Nuk do të merremi me vendet e tjera.

Kryetari i maxhorancës thotë se në parlamentin amerikan ka njerëz të zakonshëm. Ka, po jo kriminelë. Ka njerëz të zakonshëm, njerëz anonim, ka në të gjithë Parlamentet e botës, por jo kriminelë.

Më falni, po trafikantin që erdhi atëherë, nuk e mban mend, kongresmenin, që u dënua?

Jo, ai nuk ishte kriminel...

Po a u dënua? Kishte disa probleme, por nuk ka rëndësi, të mos hyjmë në këtë gjë. Nuk dua të merrem me parlamentet e tjera. Ne e kemi pasur këtë problem, e kemi marrë këtë përgjegjësi. Bëmë mirë që e morëm këtë përgjegjësinë. Disa deputetë kanë dhënë dorëheqjen.

Një kongresmen amerikan ka gabuar, ka marrë sekretarin e vet dhe e ka vënë të punojë në kopsht. Amerikanët e dënuan. Ky nuk është kriminel.

Më falni, jo nuk është ashtu. Bëj një kërkim dhe do të shikosh se ka edhe probleme të tjera. Po nuk është, se edhe unë e njoha në atë kohë. Por nuk është kjo më e rëndësishmja. Këto raste kanë ndodhur edhe në vende të tjera.

Është gjysma e Parlamentit e inkriminuar...

Po nuk është kështu. Bërja e ligjit, zbatimi i ligjit do ta pastrojë Kuvendin aktual dhe në të ardhmen.

Po ata që i sollën kriminelët aty kush do t’i pastrojë?

Është një gjykim që do ta bëjë qytetari shqiptar.

Si do ta bëjë?

Ta bëjë qytetari shqiptar. Në rast se kjo gjë ka ndodhur në zgjedhjet lokale, zbatimi i këtij ligji do ta zgjidhë edhe për ata që janë zgjedhur.

Ishte në kulm diskutimi i projektligjit për dekriminalizimin dhe ambasadori i SHBA-ve doli dhe bëri thirrje popullit shqiptar, jo më politikës, se nuk kishte besim, që të mos votonte të inkriminuarit.

Shumë mirë ka bërë.

Maxhoranca e tanishme shkoi dhe mbështeti njerëzit e inkriminuar. Sot kemi kryetarë bashkish të inkriminuar...

Në rast se ka kryetar bashkish të inkriminuar, atëherë zbatimi i këtij ligji do t’i largojë nga zyrat e tyre. Ju jeni kundër kësaj? Jo, ne e bëmë ligjin, kjo gjë do të funksionojë. Në të ardhmen, si rezultat i zbatimit të këtij ligji, nuk do të kandidojnë më njerëz të tillë.

Më falni, kush e kishte përgjegjësinë, z. Meta?

Përgjegjësinë e caktojnë qytetarët.

Jo, përgjegjësia është edhe ligjore....

Fakti që bëmë një ligj, bëmë mirë apo nuk bëmë mirë? Fakti që disa deputetë kanë dhënë dorëheqje, është pozitive apo nuk është? Duhet të bëjmë një ligj që të dënohen me ligj ata që kanë edhe përgjegjësi morale.

Ligji duhet të ketë edhe elemente që i dënon ata që i sjellin.

Gjykatësi më i mirë në këtë rast mendoj se është opinioni dhe qytetari.

Nuk është vetëm opinioni, është edhe ligji...

Atëherë do të bëhemi shumë subjektivë. Ky është një sistem që do të konsolidohet, më falni...

Nëse ne kryetarin e Partisë Socialiste ose kryetarin e Partisë Demokratike e vëmë përballë përgjegjësisë që ti po solle elementë të inkriminuar në Parlament ose në institucione më të larta të shtetit shqiptar...

Nuk i sjell dot më ai. Me këtë ligj që është bërë, nuk i sjell dot më sepse ata do të verifikohen të gjithë.

Po e ka dhënë provën në zgjedhjet lokale, i ka sjellë

Po nuk ka qenë ky ligj. Tani u bë ai. Në dhjetor u bë ligji.

Domethënë, me veprimet që ka bërë deri tani ky nuk është përgjegjës fare. Këta që i kanë sjellë nuk janë përgjegjës fare.

Shiko, politika ka përgjegjësinë e saj, por në fund fare politika ka reflektuar dhe ka ndërtuar një ligj që do të bëjë të pamundur penetrimin e elementëve të tillë në parlament në bashki dhe në të gjitha zyrat.

Pra, ju mendoni se kaq është përgjegjësia?

Përgjegjësinë më tepër e gjykojnë qytetarët, por politika reflektoi, bëri këto hapa, duke treguar një përgjegjshmëri, edhe pse me vonesë.

Nuk e kuptoj, me thënë të drejtën, nuk e di sa shikuesi e kupton këtë mënyrë sjelljeje të klasës politike shqiptare.

Me ligjet që kemi pasur deri tani, pa ligjin për dekriminalizimin, nuk ka qenë e evetitueshme që një person që ka pasur një problem, por merrte dëshminë e penalitetit dhe kështu pranohej.

Kryetari i Partisë Socialiste nuk e di këtë?

Tani kjo gjë nuk mjafton. Tani, unë nuk mund të merrem dhe të bëj investigime unë e dinte ky apo ai. Në bëmë një ligj që nuk e ka asnjë vend në Europë, për të parandaluar këto raste në të ardhmen. Mendoj se kjo është një gjë pozitive. Është vendosur një standard dhe vetë qytetarët do ta shohin në të ardhmen që kjo do të ndikojë pozitivisht.

Unë e shoh me njëfarë skepticizmi, faktin e reformës në drejtësi, dekriminalizimin apo reformat që ne ndërmarrim, sepse ka 25 vjet që këtu nuk ka fajtorë, individë, këtu fajtor është vetëm ligji. Sapo mbarojmë një proces, ne vrapojmë për të ndryshuar ligjin, për të bërë reformë. Mbarojmë një proces zgjedhor, themi fajet tani i ka ligji, dhe vrapojmë për të ndryshuar ligjin. Hajdut votash nuk ka. Shqipëria vazhdimisht ka qenë e sulmuar dhe e goditur nga ndërkombëtarët dhe nga të gjithë vëzhguesit, që kanë marrë pjesë, duke thënë që votat kanë qenë të manipuluara, procese të panjohura. Si e shpjegoni?

Mendoj se ka edhe individ fajtor, patjetër, dhe në qoftë se do të përpiqemi të zerojmë gjithçka që është bërë, atëherë është çudi e madhe se si jemi anëtar të NATO-s...

Ne nuk kemi bërë ndonjë gjë. Në NATO me detyrim na kanë futur.

Ju lutem! Si shpjegohet që jemi vend kandidat për në BE?

Me zor po të marrin, sipas meje.

Dakord. Po, të gjitha vendet kështu i kanë marrë, me zor, si puna jonë, sipas logjikës suaj.

Unë mendoj se jemi në një moment ku ka një reflektim të thellë dhe është një kërkesë e thellë e shoqërisë. Pa dyshim që është edhe e partnerëve ndërkombëtarë. Edhe vetë BE-ja ka rritur kërkesën ndaj vendeve, që aspirojnë për të hapur negociatat dhe për t’u anëtarësuar në BE. Dhe e gjithë përfshirja e tyre duhet kuptuar edhe në këtë drejtim dhe mendoj se është pozitive edhe në kushtet kur ekziston një skepticizëm apo një mosbesim i arsyeshëm dhe i pranueshëm ndaj klasës politike në vend apo edhe ndaj të gjithë atyre që përfaqësojnë sot sistemin e drejtësisë, për t’i ndryshuar gjërat me themel për të ardhmen.

Sigurisht, është edhe roli juaj, përgjegjësia juaj për të kontribuar që të kemi vërtet një hap cilësor në funksionimin e këtyre institucioneve të reja, që do të krijohen në të ardhmen, të cilat nuk duhet të dështojnë për të përmbushur misionin e tyre në drejtim të forcimit të ligjit, të ndëshkimit ndaj korrupsionit, ndaj krimit, por edhe në tërësi, për shërbimin ndaj qytetarëve, sepse nuk mendoj se reforma duhet konceptuar apo duhet kufizuar thjesht në këto synime.

Në qoftë se sot një gjyq, po themi, zhvillohet për 7 vjet apo 8 vjet, ky gjyq, në sajë të kësaj reforme, përveçse të garantojë që të jetë i drejtë, duhet të shkurtojë edhe kohën dhe qytetarët të marrin shërbime në një kohë shumë më të shpejtë dhe të marrin atë drejtësi që meritojnë.

Pra, unë besoj se jemi në kohën e duhur. I gjithë ky alarm tani, që nuk po bëhet, po shtyhet, mua më duket i kotë. Pse? Sepse, e theksoj edhe një herë, kjo reformë po ecën me ritmin e planifikuar në axhendën e përbashkët të Kuvendit të Shqipërisë dhe të partnerëve tanë ndërkombëtarë.

Pritet opinioni përfundimtar i Komisionit të Venecias, dhe pas kësaj, në një kohë të shpejtë, jam i bindur që ne do t’i japim një zgjidhje përfundimtare paketës kushtetuese, e cila do të hapë rrugën për realizimin e të gjitha ligjeve që do të sjellin një ndryshim të jashtëzakonshëm.

Unë nuk jam mbështetës i ritmeve të jashtëzakonshme, pra që në një kohë të shkurtër do të ndryshojë çdo gjë, por jam i sigurt se do të ketë një ndryshim të padiskutueshëm, një ndryshim të qëndrueshëm dhe jam optimist, por gjithmonë me këmbë në tokë.

Kështu qoftë....!

Më fal, është një problem. Përqendrimi i të gjitha baterive te reforma në drejtësi, pra në planin me marrëdhëniet me publikun, duket sikur eklipson apo anashkalon tema të tjera shumë të rëndësishme, që kanë të bëjnë me ekonominë, shërbimet publike e kështu me radhë. Pra, është e rëndësishme të ruajmë një balancë midis këtyre temave, por, pa dyshim, kryereforma që pritet është ajo në fushën e drejtësisë.

Pse nuk u bë më parë? Sepse ishte një reformë tjetër, po kaq e madhe, e cila nga pikëpamja e axhendës në kohë, ishte e paevitueshme për të qenë e para, sepse kishte një dateline, që ishin zgjedhjet vendore, reforma administrativo-territoriale, që është një ndërmarrje madhore, për të ndryshuar sistemin tonë administrativ dhe pushtetin vendor pas 25 vjetësh, që nga koha kur u shkrin kooperativat, sepse, pak a shumë, ai sistem kishte mbetur. Ishte një reformë e madhe, për të cilën u kërkua më shumë se një vit kohë. Pastaj do të fillonte reforma në drejtësi dhe jam i bindur se çdo gjë ka ecur në kohën e duhur dhe do të ecë në kohën e duhur.

Ju thoni se çdo gjë ka ecur dhe do të ecë në kohën e duhur. Le ta mendojmë se do të jetë kështu.

Po, këto kanë qenë afate. Në pranverë do të miratohen ndryshimet kushtetuese dhe do të vazhdohet me ligjet e tjera.

Ndërkohë, ka një angazhim, sidomos të BE-së, që e theksuan edhe dy eurodeputetët e dy grupeve kryesore të Partisë Popullore dhe asaj Socialiste, zoti Kukan dhe zoti Fleckenstein, si një garanci shtesë për ecurinë dhe zbatimin e reformës, për të amortizuar mosbesimin midis palëve këtu dhe për të garantuar transparencën dhe integritetin e procesit, dhe për këtë do të ketë një monitorim të vazhdueshëm, në mënyrë të veçantë nga vetë BE-ja.

Në 25 vjet në Shqipëri reformat nuk kanë munguar. Ato kanë qenë të shumta, të panumërta, por njerëz të dënuar kemi vetëm një rast të niveleve të larta, atë të Fatos Nanos, ku edhe ai doli i pafajshëm më pas. Gjykata e nxori të pafajshëm, si një të dënuar politik në kohën e Sali Berishës. Ne jemi të detyruar të jemi skeptikë dhe ju nuk jeni në gjendje të më thoni mua emra të tjerë të penalizuar në këta 25 vjet. Shqipëria është një nga vendet më të korruptuara...

Më fal, ju më thatë një emër, emrin e Fatos Nanos. Unë nuk kam ndër mend të merrem me emra të tjerë, me statistika, sepse kjo nuk është një çështje kryesore. Çdo konceptim i reformës si burgosje politikanësh për mua është një dështim i reformës. Pse? Sepse e politizon këtë proces dhe tregon, do të thosha, një mungesë vizioni të reformës. Reforma duhet parë se si ajo do të japë një impakt në të gjithë shoqërinë.

Në radhë të parë, të gjithë qytetarët kanë procese pa fund, çdo ditë kanë probleme me drejtësinë, probleme me gjykatat, probleme me prokurorinë e kështu me radhë. Burgosjet politike, siç ishte rasti i Fatos Nanos, i cili u akuzua gjoja për korrupsion, por nuk ishte vetëm korrupsioni, por gjoja edhe vala e antikomunizmit në atë periudhë, që synonte në shpërbërjen e Partisë Socialiste.

Ju e dini shumë mirë se çfarë efekti dha pas një viti nga burgosja e Fatos Nanos. Të kemi parasysh që regjimi i Doktorit, ai i pari, që e mban mend mirë, ka qenë shumë i çeliktë dhe shumë më ndryshe nga ai i dyti, për një vit, e mbani mend, se si u ndryshua, u përmbysën raportet elektorale në Shqipëri kur referendumi për Kushtetutën, i propozuar nga Presidenti i atëhershëm, Berisha, u rrëzua 60% me 40%, ku kryetari i opozitës ishte në burg.

Pra, mendoj se kjo nuk është çështja kryesore. Ky është thjesht një konceptim si shoë, më shumë për opinionin publik, pasi arrestimet e politikanëve mund të kënaqin një pjesë për një ditë, për një javë, por nuk është kjo që do të zgjidhë problemet e qytetarëve.

Ndërkohë, konceptimi i reformës si një forcim i zbatimit të ligjit, si ndërtimi i funksionit të një sistemi transparent të drejtësisë (pastaj do të vijë te pyetja juaj: Pse mendoni që kjo s’do të funksionojë ndryshe nga kjo që nuk ka funksionuar deri tani?), është preokupimi ynë, do të thosha, imi dhe i LSI-së për të ardhmen.

Pra, konceptimi i kësaj reforme, si një rithemelim i institucioneve të drejtësisë, me qëllim garantimin e një sistemi të thjeshtë, të përgjegjshëm dhe llogaridhënës, i cili nuk bazohet thjesht tek integriteti i individëve, pa dyshim është i rëndësishëm garantimi i integritetit të tyre, por barazohet te funksionimi i sistemit, që kur një individ prokuror, gjykatës apo kushdo qoftë në sistemin e drejtësisë, nën efektet e një ndikimi të caktuar politik, korruptiv, nuk merr një vendim të drejtë, ai del jashtë këtij sistemi. Kjo është shumë e rëndësishme, sepse të mos harrojmë edhe diçka tjetër, ne jemi një vend i vogël...

Në fakt, ju po thoni një gjë të drejtë, z. Meta, por ka...

Më fal, ne jemi një vend i vogël dhe, duke qenë një vend i tillë, jemi shumë të lidhur me njëri-tjetrin. Politikanët, prokurorët, gjyqtarët, të gjithë kanë familjet e tyre, lidhjet e tyre e kështu me radhë dhe në një vend të vogël këto lidhje personale janë shumë më të forta se në një vend...

Të tillë janë Luksemburgu, Malta dhe ligji atje është tjetër gjë.

Më falni, atje ligji është tjetër histori, është me qindra vjet, sepse nuk duhet të harrojmë edhe diçka tjetër, që zbatimi i ligjit është edhe çështje kulture dhe nuk është vetëm çështje ndëshkueshmërie. Pa dyshim që ndëshkueshmëria duhet të çojë edhe te krijimi i kësaj kulture.

Z. Meta, vëzhgimi juaj është shumë i drejtë dhe fakti që reforma është një gjë e domosdoshme dhe ajo nis në të gjitha hallkat e veta, madje duhet të ketë një plan të gjerë, por, në fakt, kjo reformë...

Më fal, të mos harrojmë edhe diçka tjetër. Kjo reformë në këtë proces të vetin përfshin një verifikim, një skanim të të gjithë gjyqtarëve, të të gjithë prokurorëve për të verifikuar integritetin dhe aftësinë e tyre për të qëndruar në këtë sistem, pra çfarë kanë bërë deri tani dhe çfarë janë në gjendje të bëjnë apo për të dalë jashtë sistemit. Është një masë shumë e rëndësishme dhe një masë ekstreme, e cila do ta fillojë ndëshkueshmërinë nga brenda vetë sistemit. Kjo do të thotë një paralajmërim i qartë për të gjithë ata që do të mbeten në sistem, që duhet të ruajnë integritetin e tyre dhe integritetin e sistemit dhe për të gjithë ata që do të bashkohen me këtë sistem, pasi një pjesë e tyre do të dalë jashtë sistemit dhe ky do të jetë një proces, gjithashtu, i monitoruar edhe nga partnerët tanë ndërkombëtar.

Pra, janë disa masa të forta që nuk kanë ndodhur asnjëherë deri tani duke filluar me vetë ndëshkueshmërinë brenda sistemit.

Ky është një këndvështrim shumë i qartë, z. Meta, por do një kohë pak të gjatë.

Ju lodh pak ju, pasi çdo gjë që do kohë të lodh pak.

Por duket që kjo reformë nuk është se ka nisur me këtë objektiv që ju thoni. Kjo është perceptimi i një pjese të madhe njerëzish, perceptimi i ndërkombëtareve, por edhe perceptimi i një pjese të politikanëve shqiptarë për të vazhduar të jetojnë sa më gjatë, për të rritur kredencialet e veta edhe në sy të ndërkombëtareve është një gjë tjetër. Këtu ideja është që ka aludime të ndryshme që reforma po bëhet për të burgosur politikanë....

Patjetër edhe kjo gjë mund të ndodhë dhe kjo gjë duhet të ndodhë ...

Është edhe brenda jush, z. Meta...

Kjo është tjetër gjë, dëshira brenda nesh, brenda politikës është tjetër gjë. I rëndësishëm është procesi...

Të huajt nuk është se të njohin ty apo Edi Ramën...

Nuk ka rëndësi. Rëndësi ka integriteti i realizimit të reformës dhe integriteti i sistemit të ri të drejtësisë, që do të rithemelohet pas kësaj reforme dhe kjo është e rëndësishme. Në rast se ne ruajmë integritetin e këtij procesi të reformës, dhe garantojmë integritetin e sistemit që do të themelojmë...

Të paanshmërisë, z. Meta. Kërkon integritet objektiviteti dhe jua them konkretisht, ne kemi një problem të rëndësishëm, por se çfarë do të ndodhë pastaj....

Nëse do të garantojmë integritetin e procesit të reformës dhe integritetin e sistemit që do të krijohet pastaj, nuk ka asnjë shqetësim dhe ky sistem do të funksionojë ndaj cilitdo, kushdo që të jetë, politikan apo qytetar i thjesht[.

Si do ta garantosh këtë integritet ti, kur ambasadori i SHBA-së u thotë gazetarëve që vetëm Edi Rama e do këtë reformë, kurse Ilir Meta dhe Sali Berisha nuk e duan?

Unë këtë nuk e di.

E kanë deklaruar gazetarë të njohur që kanë qenë në takim me të, në takime formale dhe informale.

Nuk e kam dëgjuar asnjëherë nga ambasadori, pasi me të kemi pasur gjithmonë mirëkuptim të plotë për çdo çështje dhe nuk duhet të merrem me komentet e gazetarëve.

Tani gazetarët, këtu edhe disa nga ata kolegët tuaj që ju i dini shumë mirë thonë që LSI-ja ka qenë kundër Byrosë së Hetimit, kur LSI-ja votoi në parlament ligjin e Byrosë së Hetimit, i cili u rrëzua më pas nga kërkesa e PD-së...

Por mund ta ketë për konsensusin LSI-ja, është temë tjetër kjo dhe mbetet re hapur...

Ne kemi qenë gjithmonë për konsensusin si standard...

Për konsensusin si standard, por edhe konsensusi ka problemet e veta, do të hyjnë edhe këtu. Të mbetemi për një moment te kjo pikë dhe më pas të largohemi. Aludimet janë për politikanë, por edhe për partnerët tuaj që punojnë me ju, që thonë se Ilir Meta është politikani si shënjestër kryesore...

Unë nuk shqetësohem për këtë çështje. Unë jam mësuar me drejtësinë politike, pra me drejtësinë pa integritet dhe të gjithë qytetarët shqiptarë e dinë këtë gjë...

Pra, ju nuk jeni i shqetësuar që e bëjnë këta njerëz që punojnë me ju?

Unë nuk kam asnjë shqetësim nga askush. Unë jam shumë i qetë, prokurorët e mi, gjyqtarët e mi, hetuesit e mi janë qytetarët shqiptarë. Ata kanë dëgjuar gjëra shumë të mëdha dhe i kanë parë sesi këto histori, këto intriga kanë dështuar. Kështu që mos u shqetëso për Ilir Metën, shqetësohu për integritetin e sistemit, kontribuo për integritetin e kësaj reforme dhe kjo është e rëndësishme për ju si qytetarë dhe për të gjithë qytetarët e tjerë.

Pra, ne t’u themi konkretisht dhe qartësisht se qëndrimet tuaja për reformën në drejtësi janë qartësisht pro për këto që keni shprehur, sepse...

Nuk e kuptoj ku keni dëgjuar ju ndonjë qëndrim kundër reformës nga...

Nga një pjesë e medias që ju sapo cituat..

Cila pjesë?

Por edhe politikanët thonë që Ilir Meta është kundërshtar i fshehtë i kësaj reforme...

Ku për shembull? Më thoni një qëndrim të Ilir Metës. Unë kam qenë gjithmonë i qartë për reformën. Kemi qenë si maxhorancë që e kemi pasur si objektiv për reformën administrative-territoriale dhe reformën e dytë për drejtësinë.

Pse pak u mundua Ilir Meta për reformën administrative-territoriale për të arritur konsensusin me opozitën, edhe pse nuk na duheshin votat e opozitës, se i kishim 84 vota edhe pa opozitën, por kemi luftuar dhe unë në mënyrë të veçantë deri në fund për t’i përfshire duke u dhënë 5 variante, duke u shkuar në Konferencën Kombëtare për Pushtetin Vendor, se gjoja do të jepnin ata varantin e tyre, duke i pritur deri në fund, duke i kërkuar Kryeministrit Rama që t’i dërgonte edhe letër z. Basha që t’i dilnim borxhit për herë të fundit se çfarë varianti kishte opozita, që ta bënim bashkë këtë reformë e kështu me radhë dhe këtë punë po bëj përsëri që çdo gjë që të shkojë sipas Venecias.

E kam thënë edhe më parë që LSI-ja do ta votojë. 20 votat e LSI-së kanë qenë dhe do të jenë për reformën. A mjaftojnë këto 20 vota për t’u bërë reforma, për të pasur ajo integritetin e duhur? I vetmi kusht është sipas Venecias. Pse Venecias? Sepse ne kemi zgjedhur dhe të gjithë e kemi pranuar që kur bëmë Kushtetutën në fillim, madje që kur filluam demokracinë që në do t’u referohemi standardeve europiane. Cili është institucioni më i lartë në Europë, më i kualifikuar për Kushtetutën? Është Venecia.

Tjetër, ne këtë reformë po e bëjmë për qytetarët tanë, por po e bëjmë që të hyjmë edhe në BE. Atëherë, përsëri kush do ta certifikojë këtë reformë për të ardhmen, pasi duhet ta përputhim legjislacionin tonë me atë të BE-së? Përsëri Venecia dhe EURALIUS, siç i kemi këtu.

Pra, Venecia dhe EURALIUS thoni ju, por ndërkohë, z. Meta, Shqipëria ka specifikat e veta dhe një pjesë e këtyre reformave në këta 25 vjet, ndoshta jo vetëm për shkak të vullneteve, por edhe për shkak të mënyrës dhe përpjekjeve për të implementuar një gjë që nuk shkon te këta njerëz. Ju jeni dakord që ndërkombëtarët, jo vetëm për reformën në drejtësi, por në përgjithësi të jenë kaq prezentë në ndërhyrjet kaq flagrante për implementimin e tyre? Nuk e mendoni këtë për një moment, pasi tani jeni në kohë mjalti me Ramën, por nesër mund të mos jetë kështu?

Unë nuk e mendoj fare këtë çështje.

Por nesër mund ta mendoni.

Më fal, por nuk e mendoj fare. Së dyti...

E mendon ndonjëherë, por nuk do ta thuash tani.

Jo se e mendoj, por ju përpara keni një politikan, i cili është i vjetër në politikë aq sa jeni edhe ju në media.

Ju e dini shumë mirë që mua si politikan, në raporte me këto probleme me drejtësinë, më ka kalitur Doktori që i ri, që me ngjarjet e Poliçanit më ka hequr imunitetin e kështu me radhë dhe ju i dini të gjitha.

Kështu që nuk i mendoj fare këto gjëra, absolutisht. Ajo që unë mendoj dhe që të gjithë duhet të mendojmë është se të gjithë të jenë të bindur që kjo reformë do të jetë një shoë, sepse shoë zgjat dhe më pas vazhdon çdo gjë si ka ndodhur.

Ju jeni i bindur 100%, Ilir Meta, që kjo reformë është “thembra e Akilit” nga ku fillon zgjidhja e problemeve në Shqipëri, ashtu sikundër ka...

Patjetër, sepse do të zgjidhë shumë probleme: problemin e gjykatave, problemin dhe funksionimin e prokurorisë, funksionimin e hetimit, funksionimin e gjykimit. Me këto lidhen probleme jetike të të gjithë qytetarëve tanë, që nga problemet e pronës, që nga problemet e korrupsionit, që nga problemet e krimit, që nga funksionimi i institucioneve e kështu me radhë.

Z. Meta, nuk ju duket që shumëkush nuk tregon se si do të bëhet kjo? Ne po dëgjojmë që një gjë është shumë e madhe, por si do të bëhet, si do të sigurohet drejtësi për qytetarët e thjeshtë?

Më fal! Unë pikërisht për këtë kam qenë, që të ketë një gjithëpërfshirje, të ketë një debat më të gjerë publik. Kemi kohë. Kemi edhe dy muaj përpara.

Ju thoni që do ta miratoni tani.

Po, patjetër, por ka kohë, sepse shumë çështje tani janë të qarta. Do të shikohet dallimi dhe diferenca se ku qëndron, fjala vjen, për gjykimin. Do të kemi një Gjykatë të Lartë nga njëra anë dhe Gjykatë të Lartë Administrative nga ana tjetër, apo do të kemi një sistem më vertikal, ku do të kemi Gjykatë të vetme supreme të Lartë, e cila do të ketë kryesisht karakter unifikues, në mënyrë që një çështje, një plagosje po themi, që ndodh sot, për të cilën në 10 gjykata të Shqipërisë mund të jepen dënime të ndryshme, për të njëjtin rast, dikush dënohet 2 vjet, tjetri dënohet 5 vjet, një tjetër dënohet 7 vjet, apo jo? Raste të tilla duhet të jenë të unifikuara, ku dënimi të jetë shumë i qartë, fitohet në transparencë, fitohet në shpejtësinë e gjykimit, në gjithçka tjetër.

Për sa i përket problemit të hetimit, duhet të evitojmë sa të mundemi pingpongun, pra policia thotë: ia çova prokurorisë, prokuroria thotë: ma solli me probleme policia. Më pas gjykata thotë: prokuroria ka bërë shkelje procedurale e kështu me radhë.

Për mua, thelbi kryesor i debatit është: si do të konsolidohet shtylla e hetimit në Shqipëri?

Ju po flisni që duhet të ketë një diskutim të gjerë për këtë?

Patjetër që duhet të ketë, duhet ta bëjmë. Deri tani ka qenë një proces ku janë angazhuar më shumë ekspertët, tani do të angazhohen edhe ekspertët, edhe politikanët.

Njerëzit, grupet e interesit...

Për disa çështje më kruçiale.

Në këtë rast duhet të marrin pjesë të gjithë njerëzit.

Po, dakord, patjetër. Unë besoj se këta dy muaj me këtë çështje do të merremi. Pas ndryshimeve kushtetuese, do të miratojmë shumë ligje. Pra, kjo nuk është një reformë që do të mbarojë në dy muaj, do të jetë një reformë që do të ketë vijimësinë e saj.

Pra, ju thoni se do të ketë një proces të hapur dhe njerëzit të kuptojnë se vërtet ne do të kemi një lëvizje pozitive.

Po, patjetër. Unë jam i bindur për këtë gjë.

Z. Meta, kalojmë në një pikë që është shumë interesante, një çështje e rëndësishme dhe e ndjeshme për ju. Ndryshimi i Kushtetutës në vitin 2008 ishte i gabuar, siç na rezultoi, apo jo? Edhe pse ne ju pamë në grevë...

Ishte shumë i gabuar.

Ndoshta edhe unë që po ju flas juve sot, ndoshta nuk ju kam dhënë 100% të drejtë atë ditë, por e vërteta ishte me ju. Ajo rezultoi shumë e gabuar. Kryetarët morën në dorë gjithçka dhe u bënë mbretër të partive. Pse ju nuk jeni tani një njeri që merrni iniciativën për të korrigjuar këtë gabim fatal të vitit 2008? Ju zotëroni çelësin e kësaj maxhorance.

Po, sepse duhet të kemi në konsideratë që ndryshimet kushtetuese nuk janë thjesht çështje maxhorance, edhe kur kjo e ka vullnetin apo konsensusin për të bërë disa ndryshime, sepse kuptohet, në këtë rast, pa një konsensus shumë më të gjerë me opozitën, edhe praktikisht, edhe numerikisht, çdo lloj ndryshimi është i pamundur. Ne jemi në një proces të reformës në Kushtetutë, por ndërkohë kemi edhe komisionin parlamentar për reformën zgjedhore, që e ka nisur punën. Ne kemi disa mendime tonat, disa opinione tonat, jemi stoik në çështjen e listave të hapura.

Konkretisht?

Jemi stoik në çështjen e listave të hapura. Ka opinione pozitive, ka opinione të ndryshme. Nuk i imponojmë dot.

Për të qenë të vërtetë, pasi kaloi pak kohë, duket sikur edhe juve ju erdhi për shtat kjo, apo jo?

Jo, absolutisht. Unë kam qenë gjithmonë për lista të hapura dhe jam ...

Nuk ju ndihmoi kjo?

Absolutisht.

Jo vetëm listat e hapura, por sistemi që u përdor...

Cili sistem?

I gjithë ligji zgjedhor.

Ne jemi për një sistem sa më transparent, absolutisht.

Të vijmë te një pikë delikate që ka të bëjë me sistemin. Çfarë sistemi preferoni ju, z. Meta?

Unë mendoj se sistemi aktual me korrektim kombëtar do të ishte më i drejti dhe më përfaqësuesi, sepse në fund fare do të garantonte edhe barazinë e votës, që është një parim bazë edhe në Kushtetutën e Republikës së Shqipërisë.

Pra, edhe një herë, sistemi... Ky që kemi?

Sistemi aktual me korrektim kombëtar.

Me korrektim kombëtar.

Po.

Domethënë, të mos jetë më rajonal.

Me korrektim kombëtar, të mos humbasim votat. Janë shumë parti që mund të humbasin vota. Pse e them këtë? Mund të kemi edhe një sistem tjetër, por edhe të ndryshosh çdo 8 vjet sistemin zgjedhor, shkojmë atje ku ishit ju që në fillim, që këto ndryshime na i kthejnë...

Qartë, ju jeni për një sistem proporcional me korrektim kombëtar.

Normalisht po, me korrektim kombëtar.

Me korrektim kombëtar. Deri dje ishte e drejtë, partitë e vogla nuk do të humbin votat. Shqipëria ka nevojë për...

Për pluralizëm.

Për pluralizëm, e drejtë. Tani besoj se nuk është sekret të themi se PS-në dhe PD-në i miklon, i tërheq ndonjëherë ideja për të ndërtuar rregulla të tilla, që do t’ia mundësojnë të gjithë tortën e pushtetit njërës parti. Shembujt i kemi pasur, apo jo, dhe përpjekje nuk është se nuk janë bërë. Përpjekja e vitit 2008, kur ju bombarduan ju, është përpjekja më e qartë në të gjitha kohët.

Meqenëse përmendët vitin 2008 dhe grevën e urisë, më lejoni të evokoj edhe qëndrimin heroik të Ora Neës.

Dhe këtu, faktikisht, është fjala për LSI-në, apo jo?

Qëndrimin heroik të Ora Neës, që u bë stacioni më i njohur në Shqipëri në atë kohë, edhe pse ishte ende në fillesat e veta, për arsye që ishte i vetmi stacion që e jepte grevën e urisë të deputetëve të LSI-së dhe deputetëve të tjerë.

Dëshira dhe pasioni i fshehtë i PS-së dhe i PD-së është shpesh që të jenë vetëm. LSI-ja është një barrë shumë e madhe për ta. Kohët e fundit e kemi të reflektuar. Mediet kanë hedhur idenë e takimeve të fshehta të lidershipit të PS-së, zotit Rama me zotin Basha, takime jashtë vendit e të tjera e të tjera. Ku ka zë, siç thotë populli, nuk është pa gjë. Cila është ideja juaj?

Unë mendoj se në çdo rast, ata që duhet të vendosin, janë qytetarët shqiptarë dhe askush nuk e pengon një forcë politike të marrë shumicën e votave për të qeverisur, edhe e vetme.

Ju sapo thatë më parë që edhe mund të pengohet. Për shembull, sistemi proporcional kombëtar i korrektuar, që ju kërkoni, do të thotë që jep mundësi për një pjesëmarrje të gjerë në parlament. Ata nuk e kanë lejuar deri sot.

Nuk besoj se kjo e ka ndihmuar parlamentarizmin, ashtu sikurse edhe vetë listat e mbyllura nuk e kanë ndihmuar parlamentarizmin, sepse ato forcojnë partitizmin.

Partitizmin, por jo kriminelë në parlament.

Besoj se kjo u zgjidh me ligjin për dekriminalizimin. Është e rëndësishme të ushtrojmë reforma zgjedhore në funksion të respektit për votën e qytetarëve shqiptarë. Askush nuk e pengon një parti të marrë 51% të votave.

Idenë e një primi, siç është rasti grek për shembull?

Eksperienca e primit, është kryesisht eksperiencë e Greqisë dhe kjo eksperiencë nuk e ndihmoi Greqinë për të evituar krizën e jashtëzakonshme. Kriza ishte rezultat i mosbërjes së reformave dhe mospasjes së transparencës së qeverisjes, e cila solli kolapsin.

Si rrezikohet transparenca, kur keni një parti të vetme që kontrollon qeverisjen apo kur janë dy, tre, katër forca politike?

Dua të them që primi nuk është ndonjë gjë e re për Shqipërinë, se ne kemi pasur fenomenin e Dushkut. Dushku ishte një prim.

Sipas jush, primi është një “Dushk”.

Po, në vitin 2001.

A duhet të jetë Ilir Meta President i Republikës së Shqipërisë në vitin 2017?

Së pari, ne e kemi një President dhe unë kam shumë konsideratë për të. Kjo mundësi ekziston për cilindo, që ka moshën 40- vjeç dhe ka një ambicie të merret me politikë.

Për Ilir Metën nuk ka qenë dhe nuk është e rëndësishme se çfarë është sot, apo çfarë do të jetë në vitin 2017 apo në vitin 2018. Më e rëndësishme është që kudo që të jetë, të shërbejë që qytetarëve tanë t’u realizohen sa më shumë pritshmëritë që ata kanë ndaj klasës politike.

Zoti Meta, ju jeni një komunikues shumë i vështirë, madje nga më të vështirët.

Të jesh i përgjegjshëm, nuk do të thotë të jesh i vështirë.

Po jua bëj pyetjen në një mënyrë tjetër, më të qartë dhe më të thjeshtëzuar: A dëshironi të jeni President i Republikës së Shqipërisë, ju, si qytetari Meta?

Mendoj se çdo politikan aktiv nuk është se nuk e mendon, apo nuk do ta pranonte këtë pozicion në një moment të caktuar dhe në rrethana të caktuara, pra asnjëherë, asnjë lloj pozicioni nuk duhet të jetë qëllim në vetvete. Ai është një produkt i natyrshëm i një situate të caktuar.

Pra, zoti Meta, ju nuk bëni përjashtim nga ata politikanë me karrierë të gjatë në Shqipëri, që ka dëshirë të jetë edhe President i Republikës së Shqipërisë.

T’ju them se nuk më ka shkuar asnjëherë në mendje kjo, nuk do të isha i sinqertë, porqë të them se ky është një objektiv i përcaktuar dhe i domosdoshëm për mua, absolutisht, sepse nuk e shikoj asnjëherë veten time në asnjë lloj pozicioni, përfshirë edhe atë aktual, si Kryetar i Kuvendit, të lidhur pazgjidhshmërisht me pozicionin apo me postin, por e shikoj në funksion të një interesi më të përgjithshëm. Në rast se do të isha i bindur se qenia ime sot, si Kryetar i Kuvendit, nuk do të ishte e dobishme...

Nuk do të ishte...

Pavarësisht sa shumë përpiqeni ju ta dramatizoni, shpeshherë edhe me të drejtë, situatën në parlament dhe që mua nuk më pëlqen edhe retorika...

Natyrisht, se ju jeni Kryetari, por ndoshta ju nuk jeni përgjegjës për...

Nuk ka rëndësi. Megjithatë, unë mendoj se për aq kohë sa mendoj se jam i dobishëm, kuptohet, me të gjitha rezervat që kushdo mund të ketë...

Me thënë të drejtën, për të mbetur edhe një moment aty, ju nuk është se keni sjellë elementë të inkriminuar në parlament, madje-madje këtë nuk ka guxuar ta bëjë as zoti Berisha, me aq sa e njoh unë...

Ylli, nuk dua të hyj në këtë ndarje përgjegjësish. Është një përgjegjësi e të gjithëve ne.

Jo, ajo është përgjegjësi...

Ne të gjithë e kemi zgjidhur me një ligj shumë të fortë.

Përgjegjësia është individuale.

Pra, dua të them se unë jam gjithmonë shumë i hapur për të qenë në funksion të çdo zgjidhjeje që ndihmon vendin.

Atëherë, meqenëse jemi në këtë pikë, zoti Meta, është një moment i vështirë në këtë pikëpamje: do të zgjidhet Presidenti, apo do të zgjidhet parlamenti i ri, sepse befas vendi, nëse zgjidhet Presidenti, mund të kalojë në krizë? Nuk do të ketë aksidente për zgjedhje të parakohshme?

Nuk më ka shkuar mendja asnjëherë për çështjen e këtyre procedurave dhe për këtë ndërlidhje që mund të ekzistojë midis këtyre dy momenteve, sepse kjo është çështje...

Procedurë është kjo, por...

Është çështje përllogaritjesh, procedurash dhe koha... Mendoj se jemi shumë larg asaj periudhe.

Shpesh ka ndodhur që edhe vende shumë të zhvilluara kanë rënë në kriza.

Tani kemi vetëm një prioritet: të kalojmë reformën në drejtësi, paketën kushtetuese. Ky është prioriteti.

Siç kaluam dekriminalizimin.

Po, e kaluam dhe të jeni të sigurt...

Sa mendoni...?

Të jeni të sigurt që ka pasur vlera pozitive, madje do të ketë akoma më shumë vlera pozitive në të ardhmen.

Ju e dini se zoti Rama është shpesh njeri shumë i befasishëm në shumë pikëpamje. Ai është një njeri i befasive të mëdha; shfaqet me interesa dhe elemente që vështirë t’i lexosh te një politikan klasik normal. Nëse zoti Edi Rama propozon Fatos Nanon, si kandidat për President, ju do ta pranonit këtë kandidaturë?

         

Jemi tepër herët për të diskutuar kandidaturat për President. Prioriteti im aktualisht është reforma në drejtësi. Çdo gjë në kohën e duhur.

Qeveria thotë se punët shkojnë mirë; madje jo mirë, por shumë mirë. Edi Rama, eh, del shpesh. Para dy ditësh ai doli dhe tha: punët shkojnë mirë, shumë mirë, por duhet të kesh sy që ta shohësh! Domethënë, ai po na akuzon neve se nuk kemi edhe sy. E kuptoni?

Po mirë, pse ndihesh fajtor? Pse ndihesh i akuzuar?

Sepse unë po e shoh që nuk është kështu.

Mendoj se zoti Rama ka të drejtë pjesërisht, sidomos kur bëhet fjalë për ju ose fjala vjen, po them kot për Arian Çanin, meqenëse isha edhe në studion e tij para disa ditësh.

Që ne nuk dimë të shohim?

Jo se ashtu, por i shikoni pak me paragjykime arritjet...

I shohim me paragjykim?!

Ose... I dramatizoni më shumë sesa duhet ndonjëherë problemet apo vështirësitë, apo edhe gabimet, mendoj unë.

Domethënë, perceptimi është çka thotë truri ynë, e kupton? Bota nuk është ajo që shohim ne.

Patjetër!

Rama këtë shikon, atë thotë; bravo! Ndoshta ne shohim gabim në këtë rast, unë konkretisht. Por ndoshta ju ka rënë shumë në sy, zoti Meta, se pas zgjedhjeve të vitit 2013, shqiptarët po arratisen nga ky vend në mënyrë masive. Sigurisht, unë nuk dua një përgjigje të tipit siç e jep ministri i Jashtëm, Bushati, se ka edhe suedezë që shkojnë në Amerikë apo ka irlandezë që zbresin në Britaninë e poshtme. Do të ishte cinike për shqiptarët që ne të flisnim me këtë gjuhë. Njëlloj siç po arratisen sirianët, po ikin shqiptarët, eh, me thënë të drejtën?!

Nuk është e njëjta gjë.

Aq dhunshëm. Këtu nuk ka edhe luftë dhe është po aq keq. Pra, gjithkush përpiqet të ikë nga ky vend, zoti Meta, me të gjitha mënyrat. Pse mendoni ju, meqenëse zoti Rama thotë se nuk kemi sy t’i shohim? Ja, këta do t’i perceptojmë apo jo, se kanë ikur 100 mijë njerëz!

Duhet të kini në konsideratë faktin se kjo tendencë, përveç vështirësive, sepse qytetarët dëshirojnë të ketë një rritje më të lartë ekonomike, të ketë vende pune më të mirëpaguara e kështu me radhë, pasi nuk kanë ikur vetëm të papunë, kemi vënë re se kanë ikur edhe qytetarë, të cilët kanë qenë në punë, por nuk kanë qenë të kënaqur me standardin e jetesës së tyre. Njëkohësisht të mos harrojmë se është bërë edhe një propagandë nga shumë rrjete trafikantësh, do të thosha unë, që e kanë kthyer në biznes këtë çështje, si në Kosovë, si në Maqedoni, si në Shqipëri. Ndoshta edhe legjislacioni...

Por shqiptarët nuk kanë shumë nevojë për rrjete trafikantësh.

Ndoshta edhe legjislacioni tepër demokratik, në mënyrë të veçantë i Gjermanisë, dhe moskthimi apo mosbërja shumë e qartë dhe e prerë e një qëndrimi që në fillim, se ata që do të shkonin do të ktheheshin, e ka nxitur këtë fenomen. Sigurisht, ne duhet të gjejmë përgjegjësi për situatën brenda vendit, por të mos ia faturojmë të gjitha përgjegjësitë qeverisë, megjithëse ajo merr gjithmonë një përgjegjësi më të madhe sesa opozita, por t’ia faturojmë pak edhe vetë klimës politike në vend. Është një klimë tepër konfliktuale: çfarë thatë ju më përpara, dëgjojmë “krim”, “korrupsion”... Po të dëgjosh parlamentin sot, siç e përshkruat edhe ju, vërtet tmerrohesh, vërtet mendon, madje me të drejtë, se këtu nuk do të bëhet kurrë reforma në drejtësi. Por unë jam i bindur se ajo do të bëhet, ama kjo klimë e së enjtes në parlament dhe çdo ditë, siç e përshkruat ju, nga një seli në tjetrën, me akuza, me kundërakuza krijon një lloj depresioni, krijon një lloj pesimizmi, ndërkohë që duhet të flasim më shumë për ekonominë, të flasim më shumë për vende të reja pune, se si duhen hapur; të flasim për të diskutuar më mirë...

Ju i thoni shumë mirë gjërat, zoti Meta...

Më falni, por kjo është çështje e një klime të përgjithshme!

Por Kryeministri tha: “Ka shumë vende pune, por nuk ka njerëz”. Nuk ndodh kjo në botë!

Ka një të vërtetë.

E keni dëgjuar ju këtë? Cili kryeministër e ka thënë këtë?

Ka një të vërtetë... E vërteta është se për shumë profesione, për të cilat ka kërkesa për vende pune, ne kemi mangësi me fuqi punëtore, si, për shembull, vende që kanë të bëjnë me zhvillimin e industrisë mekanike. Për funksionimin e shumë aktiviteteve të ndryshme janë detyruar edhe shqiptarët të marrin italianë ose grekë për t’i bërë ato punë.

Kjo është vendosur edhe në...

Sepse ne, me të drejtë, patëm edhe krizë të madhe...

Edhe kuzhinierë italianë mund të marrësh. Në Britani janë të gjithë kuzhinierë italianë.

Ne patëm një krizë të madhe...          Po flasim për zhvillimin e industrisë, për zhvillimin e atyre sektorëve, që e rrisin ekonominë e vendit më shpejt dhe që shtojnë vlerën e shtuar.

         

Ju jeni në koalicion, ndaj është edhe detyra juaj, zoti Meta, që ta mbroni këtë qeveri, eh, se një pjesë e kësaj qeverie është juaja.

Nuk është thjesht qëllimi për të mbrojtur qeverinë, por unë mendoj...

Jo, është edhe qëllim.  

...për të qenë sa më realistë.

Nesër do të jeni përgjegjës, zoti Meta...

Po, patjetër, ne do të marrim përgjegjësitë tona dhe i marrim vazhdimisht. Ne nuk mendojmë se situata në vend është e mrekullueshme. Asnjëherë s’e kemi menduar këtë. As kur kemi qenë në koalicion me zotin Berisha. Nuk kemi thënë asnjëherë se jemi duke konkurruar rrotë më rrotë me Gjermaninë, për sa i takon zhvillimit dhe rritjes ekonomike. Përkundrazi, kemi qenë të shqetësuar. Unë mund ta përsëris edhe një herë këtu, se kohë përpara se të përfundonte mandati i qeverisë së zotit Berisha, kur ne ishim në koalicion me të, kam kërkuar që të bënim marrëveshje bashkëpunimi me FMN-në, për të parandaluar përkeqësimin e treguesit makroekonomik të rritjes së borxhit, të rritjes së deficitit, me të cilat u ndesh qeveria e re, që erdhi në pushtet pas zgjedhjeve të vitit 2013, por të mos harrojmë, dhe e theksoj edhe një herë tjetër se situata nuk mund të zgjidhet e të përmirësohet edhe duke ndryshuar raportet. Më fal, në rast se opozita e nesërme, pra maxhoranca e sotme, do të sillet në të njëjtën mënyrë siç sillet opozita e sotme.

Kjo klimë politike, kjo luftë e pandërprerë, me akuza të pafundme, të cilat bëhen në parlament, por që asnjëherë nuk ndiqen në rrugën e drejtësisë, padyshim që krijon një gjendje pesimizmi, shteron energjitë pozitive, e largon edhe vëmendjen...

E drejtë. Teorikisht kështu është.

Jo s’është teorikisht, është realisht. E largon vëmendjen nga prioritetet... Nga prioritetet kryesore, me të cilat duhet të merret politika.

Në bisedat tuaja të përjavshme, ndonjëherë edhe të gjata – një herë në javë ju takoheni me zotin Rama – përveç problemeve të koalicionit, a diskutoni ndonjëherë edhe për ekonominë, për shembull? Çfarë ju thotë ai? Çfarë i thoni ju? Siç thatë për Berishën. Se tani nuk është se u hapën arkivat, dhe ti duhet të tregosh pas katër vjetësh çfarë i ke thënë Berishës pasi ike nga koalicioni me të.

Së pari, unë mendoj se qëndrimet tona publike, edhe për ekonominë, edhe për buxhetin, edhe për politikën e investimeve, edhe për politikën e shpenzimeve, janë të bëra publike. Se çfarë bisedojmë ne, kjo nuk është e detyrueshme që opinioni ta dijë, por mendimin tim për çështje të caktuara mund t’jua them përsëri.

Ju s’flisni për bombën bërthamore.

Ju natyrisht që e keni të vështirë, e madje mund të më qesëndisni edhe mua këtu, nëse unë ju them se Standard and Poor’s bëri një përmirësim.

Atë BB-në?

E dija që do të më qesëndisje dhe mua.

Edhe atë të “The Economist”-it e harruat, për shembull, që zoti Rama doli në fotografi në katër pesë faqe të gazetës prestigjioze dhe pagoi 360 mijë euro. Edhe BB-në mund ta blesh, zoti Meta. Shumë gjëra janë të bleshme sot, në këtë botë.

Po prandaj thashë se ju i keni...E vërteta është kjo: që treguesit makroekonomikë, performanca makroekonomike e vendit është përmirësuar. Kjo është e vërtetë. A ka ndikuar kjo drejtpërdrejt në prekjen e këtij progresi nga ana e qytetarëve shqiptarë? Ende jo, sepse për të shkuar nga makroekonomia te ekonomia familjare, padyshim që duhet një kohë e caktuar.

A është kjo rritje ekonomike – që askush s’e vë në diskutim që është përmirësuar – e mjaftueshme për të zgjidhur problemet e akumuluara sociale të Shqipërisë dhe të shqiptarëve? Sigurisht që nuk është e mjaftueshme. Prandaj, edhe ne e theksojmë vazhdimisht, që ekonomia jonë duhet të rritet në kapacitetet e saj, jo nën kapacitetet e saj, ka ende hapësirë për këtë çështje, dhe këtu duhet ta përqendrojmë edhe ne debatin tonë.

Ju nuk keni qenë dakord me këtë sistem taksimi që përdori zoti Rama në mënyrë të rrufeshme, të menjëhershme.

Tani, ky ka qenë një premtim kryesor i Partisë Socialiste.

Por jo juaji.

Ne nuk kemi qenë partizanë të kësaj çështjeje, por të mos harrojmë se Partia Socialiste mori 65, 66 mandate, e kishte premtim kryesor, dhe natyrisht që ishte një politikë, e cila duhej të ishte prioritet i kësaj qeverie. Prandaj, ne nuk mund vendosnim kushte apo veto për një çështje të tillë.

Së dyti, çështjen e politikës së taksave, ne nuk e kemi parë asnjëherë si një problem ideologjik. Ne e shohim si një instrument, që duhet parë në radhë të parë në interes të rritjes ekonomike të vendit, e më pas është kjo rritje që ka mekanizmat e veta të një shpërndarjeje më të drejtë sociale të saj. Ajo që dua të theksoj gjithashtu, është se dhe taksa e sheshtë, e cila dha efekte pozitive fillimisht, për një kohë të gjatë... Të mos harrojmë se taksa e sheshtë vazhdonte, dhe ndërkohë niveli i të ardhurave erdhi duke rënë viteve të fundit, sepse kjo kishte të bënte edhe me vetë ritmet e rritjes ekonomike në Shqipëri, në rajon, me efektet e krizës greke, të krizës italiane, të eurozonës e kështu me radhë.

Kështu që nuk mund të absolutizojmë apo të themi se faji është i sistemit të taksave, por një gjë mund ta them me bindje: që ka vend për të përmirësuar ndjeshëm klimën e biznesit në vend. Këtu duhet shumë punë.

Në tryezat e takimeve tuaja, zoti Meta, përveç takimeve fillestare që bëni me zotin Rama drejtpërdrejt, tani janë shtuar edhe anëtarë të tjerë të qeverisë. E vëmë re që hyjnë e dalin. Së fundi, për shembull, kemi parë Arben Ahmetajn edhe me një dosje, pra që vjen me një dosje të madhe në këtë takim. Çfarë bisedoni në këto takime? Po Arben Ahmetaj, po dhe të tjerët, çfarë bisedojnë? Ç’kontribut kanë?

Ne bisedojmë për çështje të caktuara të ekonomisë, të bujqësisë, për çështje të rendit, sipas temave apo prioriteteve të ndryshme, për çështje të ligjeve që do të diskutohen, të kalendarit të parlamentit,pra diskutojmë çështje të ndryshme.

Shpeshherë vëmë re acarim të marrëdhënieve. Dhe zoti Rama bën pjesë edhe si, domethënë, çast për shikuesin edhe në vitin 1997. E me të drejtë. Në qoftë se gjërat në ekonomi do të venë shumë keq, mund të afrojë viti 1997 dhe s’do të kemi nga t’ia mbajmë.

Mendoj se ka qenë një çast...

Pastaj, befas del Petrit Vasili dhe bën të kundërtën brenda një kohe shumë të shkurtër. Duket edhe si joserioze kjo, zoti Meta. Duket si politikë amatore, në këtë rast. Kur hyn Shuli si një nga politikanët më...

Varet si e shikon. Së pari, unë nuk mund të merrem – dhe e kam të pamundur – tërë ditën se kush do të dalë dhe çfarë do të thotë, nga Lëvizja Socialiste për integrim. Së dyti, zakonisht, në podiumin e LSI-së dilet në emër të LSI-së, pra, mbasi është gjykuar një qëndrim i caktuar nga kryesia apo nga një forum i saj. Pa dyshim çdo deputet, çdo drejtues i LSI-së ka të drejtën e tij të shprehë mendime kudo, dhe s’ka pse të më marrë mua leje, sepse ka mendimin e vet, siç ndodh në çdo forcë politike demokratike, por qëndrimi në emër të LSI-së mund të shprehet vetëm pasi ka një diskutim apo një vendim të kryesisë.

Në rastin konkret, ka qenë një vlerësim individual i zotit Rama dhe mendoj se edhe përmendja e ’97-ës ishte e pavend, gjë që e bëri të qartë edhe zoti Vasili.

Se mua më kujtohet ’97-a si erdhi. Se ne i fshiheshim kësaj...

Ne nuk mund ta lejojmë Shqipërinë të kthehet...

S’të pyet Shqipëria në atë moment. Pse, ti mendon se zoti Berisha donte ta lejonte? Unë kam qenë aty afër. Mendon se donte ta lejonte të vinte? Në asnjë mënyrë.

I kishte mundësitë ta pengonte. Sepse mesazhet e FMN-së ishin të qarta.

Erdhi si cunam pastaj.

Natyrisht që erdhi, sepse ndodhën shumë gjëra bashkë.

Po pra, edhe mund të vijë ajo dhe nuk të pyet.

Unë mendoj se jemi vend me eksperiencë tjetër, me maturim tjetër demokratik. Padyshim që s’jemi as në ’96-ën, as në ’97-ën.

A mund të na thoni se ç’ndodh realisht me koalicionin? A keni probleme me koalicionin?

Ju përmendët problemin e Luan Ramës me Petrit Vasilin. Kemi ndonjëherë probleme edhe brenda vetes në kuptimin e mire të fjalës, se çfarë do të thotë problem. Ne në objektivat kryesore jemi të koordinuar, të rakorduar. Koalicioni ka treguar qartë se funksionon. Ka mendime të ndryshme për çështje të caktuara, por mendoj se ka respekt të këtij diversiteti. Jemi dy forca komplementare.

Ku ndaheni ju, nëse ndaheni me qeverisjen “Rama”? Ju keni katër ministra në kabinet, pjesë e rëndësishme e strukturës së piramidës së qeverisjes. A mendoni se ai po gabon? Cilat janë sukseset më të rëndësishme të tij dhe ku po gabon zoti Rama? Është e vështirë të thoni...

Së pari ne nuk ndahemi, ne jemi pjesë e një maxhorance dhe e një qeverie, apo qeverisjeje. Kjo qeveri mendoj se ka ndërmarrë disa reforma të rëndësishme historike dhe madhore siç ishte ajo administrative dhe territoriale.

Nuk është bërë ajo, zoti Meta. Mos t’i hyjmë se dalim jo mirë. Janë hequr vetëm vija. Unë kam bërë një emision të posaçëm për atë dhe janë hequr vetëm vija në hartë.

Më falni! Nuk është kështu. Më falni! Implementimi i saj është tjetër çështje. Ishte gjë e thjeshtë për t’u bërë reforma? Nuk ishte gjë e thjeshtë. Implementimin do ta bëjmë bashkë. Monitorimin e reformës do ta bëjmë bashkë. Edhe emisionet tuaja për këtë gjë do të ndihmojnë. Nuk është gjë e vogël.Nuk është çështje e vijave. Është një konceptim krejt i ri i pushtetit vendor, i administrimit të tij, i shërbimeve, i cilësisë së tyre. Nuk mund të dalim ende mirë, sepse ajo tani ka filluar të japë efektet.

Heqja e vijave nuk është reformë.

Bërja e ligjit, nuk ishte reformë? Ky realitet i ri, nuk është reformë? Impakti duhet dhënë te shërbimet, te cilësia e re e shërbimeve. Janë edhe shumë ligje të tjera në zbatim të reformës administrative-territoriale..

Z. Meta, ju keni kërkuar herë pas here rifreskim të qeverisë, ndryshime në qeveri.

Impulse.

Ju bëtë njëherë një ndryshim. Morët një ministër dhe i dhatë impuls tjetër në drejtësi. Ishte edhe reforma e të tjera dhe i dhatë zotit Rama të drejtën e impulsit, i sollët një ministër tjetër dhe filluan impulset e reja.

Impulset nuk janë domosdoshmërish të identifikuara me emra.

Ju mendoni se këta që janë te zoti Rama ndryshuan...

Nuk është se mendova unë këtë gjë, unë mendoj që të gjithë ne duhet të ndryshojmë çdo ditë, në kuptimin e përmirësimit.

As te mekanizmat nuk ndryshojnë impulset. Nëse lëshojnë këto impulse, ato lëshojnë dhe nesër.

Unë mendoj se ne të gjithë duhet të ndryshojmë çdo ditë në drejtim të reflektimit, të përqendrimit. Pra, të mos humbasë ritmi i angazhimit për të përmbushur reformat, detyrimet që kanë ministrat, funksionarët e saj, deputetët, maxhoranca dhe kështu me radhë. Në këtë drejtim gjithmonë ka nevojë për impulse të reja. Ky është kuptimi kryesor i impulseve.

Impulse të reja nuk do të thotë thjesht ndërrime të ministrave, por ata të prodhojnë impulse të tjera, të ndryshme nga...

Patjetër, nga qeveria, Kryeministri, maxhoranca...

Ju besoni që Saimir Tahiri, ju mbase keni fokusuar Ministrinë e Shëndetësisë apo ndonjë tjetër, po prodhon impulse të reja?

Unë mendoj se të gjithë nuk duhen paragjykuar, duhen mbështetur për të pasur impulse të reja.

Ju mendoni se kanë filluar këto impulse të reja?

Natyrisht, se çfarë mendoj unë apo se çfarë mendoni ju, kjo është e qartë për opinionin, që janë dy gjëra krejt të ndryshme. Që unë mendoj se ka vend për përmirësim? Patjetër që ka! Kudo, në çdo fushë, në çdo sektor.

Gjithë jeta e vendit sot po koncesionohet me ritme të shpejta, ekonomia e gjithë andej. Shpesh mbrapa këtyre koncesioneve qëndrojnë biznesmenë pranë qeverisë, klientë të zotit Rama të drejtpërdrejtë, miq të dikurshëm të tij dhe vijojnë të jenë të tillë. Ata numërojnë koncesionet e kësaj natyre: një, dy, tre, pesë, dhjetë, pesëmbëdhjetë. Janë emra të posaçëm, të veçantë, që janë thjesht miq dhe klientë të zotit Rama. Klientë të qeverisë. Si e mendoni këtë?

Unë nuk dua të hyj në investigime, se cilët janë biznesmenët që qëndrojnë mbrapa koncesioneve, sepse nuk është kjo aspak detyra ime, as nuk merrem me paragjykime. Lidhur me partneritetin publik privat dhe me çështjen e koncesioneve qëndrimi im është ky: një shqetësim publik që po vjen në rritje për mënyrën e administrimit të ekonomisë, të shërbimeve publike duhet marrë më seriozisht në konsideratë. Problemi nuk qëndron te vetë koncesioni, nuk qëndron as te partneriteti publik privat si koncept, si instrument, por qëndron në transparencën e detyrueshme që duhet ta sanksionojmë më mirë dhe me legjislacion, e cila do të bëjë të mundur: e para, vetë qeveria përpara se të miratojë një partner publik privat apo para se të akordojë dhënien e një shërbimi apo investimi me koncesion, të ketë një analizë shumë më të plotë të përfitimeve, të dobive, që do të ketë ekonomia, shoqëria, qytetari. Absolutisht, kjo gjë të ndodhë në mënyrën më transparente. Kjo është shumë e rëndësishme, sepse ka pasur mjaft dështime me koncesionet në të kaluarën para vitit 2013, nuk mund të themi se janë dhënë me qëllime të mbrapshta, pavarësisht se mund të ketë pasur edhe presione, klientelizëm, por fakti ka treguar që në përgjithësi kemi pasur jo pak dështime, të cilat nuk i korrigjojmë dot sot, sepse do të shkojmë nëpër arbitrazhe me kompanitë e huaja.

Megjithëse Arben Ahmetaj, thotë po i korrigjoj. Del drejtori i Rinasit dhe thotë nuk kemi asgjë.

Më falni! Ajo është një çështje tjetër, diku në mes. Ka një negociatë e cila nuk duhet t’i jepet publikut pa u mbyllur, pa u përmbyllur, sepse janë dy palë, të cilat janë në proces diskutimesh, e cila në çdo rast do të vijë në parlament. Pra, opinioni do të gjykojë nëse do të jetë apo jo në interes të publikut, rishikimi i saj. E kam fjalën, se ka një shqetësim të drejtë. Qëndrimi im ka qenë dhe është se duhen ndërmarrë iniciativa në legjislacion, në mënyrë që këto koncesione, si edhe këto sipërmarrje të partneritetit publik dhe privat të jenë të analizuara në një mënyrë më profesionale dhe të pavarur për përfitimet që do të ketë vendi. Në momentin kur ato e kapërcejnë afatin e mandatit të një qeverie, detyrimisht duhet të kalojnë në parlament.

Kanë afat 10-15- vjeçar.

Dakord. Ky është qëndrimi. Unë them se është një shqetësim i drejtë. Opozita ka të drejtë të ngrejë pretendimet dhe shqetësimet e saj, por do të ishte e mirë, do të ishte në dinjitetin e saj, do të ishte edhe ajo më e besueshme që, kur flet për koncesione të dhëna gjatë kësaj periudhe, të bënte një autokritikë të thellë për shumë nga koncesionet e dështuara të dhëna dhe të miratuara përpara vitit 2013. Për të ardhmen patjetër që kërkohet një transparencë dhe garanci të forta për mbrojtjen e interesit publik.

Ju po thoni gjëra shumë të drejta, por …

Do të ketë edhe iniciativa në këtë drejtim, të cilat forcojnë legjislacionin.

E pjesës suaj të qeverisjes, e partisë suaj?

Ne këtë çështje e kemi biseduar edhe me kolegët tanë të Partisë Socialiste, unë e kam biseduar edhe me ministrin e Drejtësisë, që edhe ai ta shikojë këtë mundësi, sepse, duke qenë ministër i Drejtësisë, e ka këtë mundësi, por mund të ketë iniciativa edhe nga një grup deputetësh. Pra, është një çështje që duhet të marrë drejtim dhe opinioni të jetë i qetë, i sigurt dhe besimplotë që një partneritet publik privat apo dhënia me koncesion e një shërbimi apo e një investimi gjithmonë do të mbrojë interesin e tij. Kjo është shumë e rëndësishme. Natyrisht, kjo është pozitive edhe për qeverinë, sepse i heq mundësinë e spekulimit. I heq mundësinë e spekulimit edhe opozitës.

Por që kjo të fillojë, këto tre P-të, partneritetin publik privat ju nuk duhet ta konsideroni të tillë. Ju jeni një njeri, e thashë disa herë, me përvojë të madhe, keni qenë kryeministër, kjo shpikja partneritet publik privat, që ngatërrohet me të huajt, nuk ka të bëjë me koncesionet. Këto janë tendera të fshehta. Ç’lidhje kanë këto me koncesionet?

Unë nuk dua të hyj, nuk dua të bëhem pjesë fare.

Publiku këto do të dijë. Në qoftë se ne nuk diskutojmë asnjëherë plagën, po i shkojmë asaj në mënyrë shumë të sipërfaqshme, në qoftë se ne themi koncesion...

Zoti Rakipi, besoj se isha shumë i qartë për opinionin publik. Çdo partneritet apo çdo koncesion, për mendimin tim, duhet të jetë shumë më transparent sesa deri tani dhe kjo kërkon garanci në përmirësimin e legjislacionit dhe, kur zgjat më shumë sesa katër vjet, duhet të kalojë në parlament.

Kjo nuk mjafton. Unë pres që ju të thoni që ligji duhet të veprojë, sepse kjo është antiligjore. Në qoftë se ti nën emrin koncesion, fsheh tenderin, merr paratë publike të shqiptarëve dhe ia jep dikujt, do të thotë që ky nuk është partneritet publik privat. Kjo është vjedhje e drejtpërdrejtë, ky është tender i hapur.

Unë dhashë një përgjigje shumë të saktë dhe do të ketë iniciativa legjislative. Për çështjet që kanë të bëjnë me shkeljen e ligjit, nuk jam unë autoriteti që e konfirmon këtë gjë.

Ju jeni Kryetar Kuvendi, jeni bashkëqeverisës, jeni përgjegjës. Në qoftë se nëpërmjet shëndetësisë u vidhen shqiptarëve paratë publike, gjysmë miliardë euro, zoti Meta, ju jeni përgjegjës nesër.

Dakord, por unë nuk mund ta marr apriori të mirëqenë përllogaritjen që keni bërë ju.

Rapiskani është vjedhja e shekullit. Këtu nuk ka as biznesmenë, se e kanë ulur kokën nga turpi dhe nga frika deri atje sa nuk shkojnë as deri në gjyq. Në 20 pika doganore që ke ti, ti i merr paratë e Rapiskanit pa pasur pajisje, ti vjedh shqiptarët në mënyrë të drejtpërdrejtë.

Kur është bërë kjo?

Kjo ka një vit e pak. Mos i merr lekët kur s’ke pajisje.

Është bërë më parë.

Në kohën e Berishës dhe kontrata e dytë është tani. Kontrata e dytë është më e rrezikshme.

Është e rishikuar.

Zoti Meta, energjia elektrike vjen nga jashtë me tela dhe paguhet Rapiskani. A e di çfarë turpi është ky, apo jo? Kompania “Memo” i ka shitur një shqiptari, një kompanie këtu, 49% të aksioneve, 4900 lekë të vjetër, domethënë me lekët e një pakete cigareje, i ka dhënë 7 milionë euro në vit. Çdo vit një kompani këtu do të marrë 7 milionë euro dhe kjo është bërë tani në këtë qeverisje, edhe në të parën. Unë të mora një shembull që vjen në të dyja qeverisjet që nga koha e qeverisjes së Berishës edhe sot. Kjo kompani është në të dyja rastet, nuk mora shëndetësisë, ku paratë e Bankës Botërore janë investuar për sterilizimin dhe e merr privati, e merr një njeri që me 1 mijë euro ka ngritur kompani. Pra, zoti Meta, këtu duhet të ketë përgjegjës. Këto janë paratë e shqiptarëve

Jam shumë dakord.

Po, pra, por duhet të ketë edhe përgjegjës, jo vetëm që ju do të bëni një ligj tani për t’i rregulluar ditën që do të vijnë, nuk do të ketë përgjegjës.

Po pse kjo nuk është e rëndësishme?

Ju jeni njeri politik shumë i rëndësishëm. Zoti Meta, është shumë e rëndësishme kjo që thatë ju.

Më fal, ka një shkelje të ligjit, duhet të veprojë Prokuroria.

Por ju duhet të konsideroni të rëndësishme edhe atë që ka vjedhur paratë?

Unë nuk mund të paragjykoj, më vjen keq, ju keni mendimin tuaj të pavarur ajo është një çështje për të cilën duhet të veprojë prokuroria. Unë si politikan kam për detyrë t’ju them që e ndiej këtë shqetësim në rritje të opinionit publik. Shqetësimi është i drejtë, sepse shumë koncesione kanë dështuar në të kaluarën, shumë partneritete publike- private kanë dështuar dhe me pasojat e tyre po ndeshemi edhe sot dhe nuk është e thjeshtë për t’i zhbërë ato, sepse qeveria dhe shteti do të shkojnë në arbitrazh dhe do të dëmtoheshin shumë më tepër qytetarët shqiptarë dhe taksapaguesit shqiptarë. Për t’i parandaluar të gjitha këto fenomene në të ardhmen, ne jemi të angazhuar për të përmirësuar legjislacionin në mënyrë që të garantohet dobia e tyre në të ardhmen dhe njëkohësisht të garantohet transparenca në raport me opinionin publik. Për sa i takon shkeljes së ligjit kjo është një çështje që i takon Prokurorisë, nuk është një çështje ku unë mund të marr atributet e prokurorisë.

Ju përmendët BB-në, që ne kaluam BB plus, unë do t’ju risjell dhe një herë një moment tjetër përveç BB plus, rritjes së sigurisë që ne kemi. Për sistemin bankar është kjo, apo jo!

Kjo është performanca...

Në revistën prestigjioze britanike “The Economist” janë paguar shumë para për të dalë kryeministri në disa faqe. Çfarë mendoni ju për këtë gjë? Pra, të marrësh paratë e njerëzve dhe të dalësh te gazeta “The Economist”, vetëm Arben Ahmetaj ka mbetur pa dalë aty me çantë me dosje, çfarë është kjo? Kujt ia tregon këtë? Pse është kjo?

Aty ka pasur ekspozime të disa arritjeve të Shqipërisë, të reformave të vendit, një administrim më i mirë i marrëdhënieve ndërkombëtare me publikun, ku pa dyshim që është i rëndësishëm dhe i domosdoshëm për të ardhmen.

Pra, ju mendoni se qeverisja me këtë lloj përgjegjësie, duke shpërndarë pronën publike nëpërmjet koncesioneve ose tenderëve të fshehtë, është një praktikë që duhet të marrë fund, një praktikë që duhet të kontrollohet seriozisht?

Unë e theksova se transparenca e këtyre formave duhet të rritet sa më shpejt duke bërë ndërhyrje sa më të shpejta në legjislacion, në mënyrë që edhe shqetësimi në rritje i opinionit publik të marrë një përgjigje të përgjegjshme, të menjëhershme dhe njëkohësisht të garantojmë që këto forma do të jenë gjithnjë në interes të publikut, në interes të qytetarit, nuk do të kenë një kosto më të lartë për qytetarin shqiptar dhe absolutisht që ne jemi të angazhuar për ta bërë këtë gjë.

Kjo duket një gjë e mirë, gjithmonë nëse do të ndodhë ...

Patjetër që do të ndodhë dhe kjo do të ndodhë në sytë tuaj, në sytë e medias dhe të opinionit publik.

Z. Meta, një kundërshtar i njohur i z. Edi Rama, brenda PS-së, z. Ben Blushi, ka shumë ditë që kërkon respektimin e statutit të kësaj partie. Ai i kërkon z. Rama që ai të kandidojë për kryetar të partisë, pra të bëhen zgjedhjet. Duket që ai do të jetë një kandidat për PS-në, por ende kjo parti nuk konfirmon dot nëse do të apo jo bëjë zgjedhje. Ju jeni nga politikanët më me eksperiencë dhe më të njohur të vendit, si dhe e njihni mjaft mirë këtë parti, jo vetëm pse keni ikur nga ajo....

Së pari, unë nuk dëshiroj të hyj në çështjet e brendshme të Partisë Socialiste. Kam qenë pjesë debateve të brendshme të kësaj force politike deri në vitin 2003. Mendoj se keqmenaxhimi i atij debati solli ato zhvillime, të cilat të gjithë i dimë. Besoj se Partia Socialiste do të dijë, përmes kongresit të saj, i cili është shpallur më 19 mars, të bëjë zgjidhjet më të mira të saj edhe për këtë çështje, pra për çështjen e zgjedhjes së kryetarit dhe për çështje të tjera. Nuk do ta konsideroja këtë debat si diçka të papranueshme, por, natyrisht, mendoj që në rast se do të ishte një debat më i përmbajtur, do ta ndihmonte edhe vetë përmbajtjen e debatit.

Në Australi besoj kryeministri aktual ra për shkak se humbi zgjedhjet në parti. Domethënë, ideja për t’u mbrojtur me fitoren e madhe që ke kryer dikur, nuk besoj se është një shkak, apo jo?

Kjo nuk është një çështje që më takon mua për ta komentuar.

Po sikur kjo të ndodhte te partia e Merkelit. Për shembull, do të çmendej Merkeli dhe të thoshte se nuk dëshiron të zgjidhet, kështu do të rrijë gjithmonë. Çfarë do të mendonit ju, ma thoni këtë?

Ju gjithmonë keni dëshirën tuaj për tëkaluar nga një ekstrem në tjetrin.

Po ju pyes, sepse ju për Ramën dhe për Blushin nuk doni ta thoni, atëherë thuaje për Merkelin...

Aq më tepër nuk mund të flas për çështjet e brendshme të CDU-së.

Fol për CDU-në, se aty nuk ka rrezik!

Boll që të flas për dikë! Kjo është në parim: nuk ndërhyhet për çështjet e brendshme të një force të caktuar politike. Ky debat që po ndodh, në qoftë se do të jetë më i përmbajtur do të ndihmojë vetë përmbajtjen e debatit.

Atëherë, z. Meta, ta shtyj më tej, keni shpallur edhe ju zgjedhje dhe do të bëni votimet: një anëtar një votë.

I ka shpallur z. Luan Rama.

Po z. Luan Rama është përfaqësuesi që i shpall në emër të partisë suaj?

Nuk është mbledhur ende Kryesia dhe Komiteti Drejtues i LSI-së.

Për ta pranuar, apo jo?

Jo për të bërë shpalljen e këtyre zgjedhjeve, sepse jemi në kohë, ne e kemi mandatin në shtator ose në tetor do të mblidhemi. Aktualisht, prioriteti ynë kryesor është paketa kushtetuese e reformës në drejtësi dhe më pas do të zhvillojmë edhe zgjedhje brenda LSI-së.

Pra, do të zhvilloni zgjedhje?

Po, patjetër, është normale.

Pse i zhvilloni ju? Më mirë mos i zhvilloni, sepse edhe ju keni fituar në këto zgjedhje! Në këto zgjedhje që ne jemi, jeni edhe ju në pushtet.

Unë nuk i paragjykova. Edhe Partia Socialiste po i zhvillon dhe mund t’i zhvillojë.

Por edhe ju mund ta bëni këtë punë, mund të mos i zhvilloni zgjedhjet...

Po pse doni që unë patjetër të përfshihem në këtë debat të brendshëm?

Ju do të votoni vetë? Sepse keni qenë në këtë debat, ju keni qenë një nga njerëzit e rëndësishëm të kësaj partie.

Unë kam qenë para 12 vjetësh.

Për shkak të problemeve jodemokratike që kjo parti pati për një pjesë të mirë të kohës, ju jeni larguar dhe të gjitha... Domethënë, partitë shqiptare kanë qenë të mbushura me të tilla gjëra dhe ne për këto gjëra do t’ju pyesim z. Meta.

Unë besoj se socialistët i kanë të gjitha përvojat, të mira dhe të hidhurat, për të qenë më të përmbajtura në këtë debat dhe për të dalë më të fortë nga ky debat.

Në zgjedhjet tuaja ju, sigurisht, do të kandidoni, apo jo?

Në zgjedhjet e vitit 2017 apo të LSI-së?

Në zgjedhjet për kryetar të LSI-së.

Besoj se po.

Cila është e ardhmja e LSI-së? Ku e shihni LSI-në në 10 vitet që do të vijnë? Po e bëj këtë pyetje për të dalë në një plan më të gjerë...

Unë e shoh LSI-në në 10 vjet të jashtëzakonshëm, sepse e shoh Lëvizjen Rinore për Integrim sot pas 10 vjetësh. Jam krenar më shumë se për çdo gjë tjetër si kryetar i LSI-së për atë që kemi bërë, duke investuar të gjithë përkushtimin dhe eksperiencat tona të së kaluarës në mbështetjen e një organizate të jashtëzakonshme rinore politike, siç është Lëvizja Rinore për Integrim, ku kemi të rinj në një moshë shumë të re, 21-22 apo 23 vjeç, por me një eksperiencë shumë të madhe, për arsye se janë angazhuar në këtë organizatë në një moshë fare të vogël. Rasti më konkret është ai i deputetes më të re në Kuvend, Kejdi Mehmetaj, e cila është 21 për 22 vjeç, por ka një pjekuri politike të admirueshme.

Ju keni thënë se do të merrni edhe më të rinj...

LSI-në pas 10 vjetësh shikoj LRI-në e sotme. Në fakt, ajo do të jetë LSI-ja e vërtetë, sepse unë, aq më tepër z. Braho, sepse atij nuk i mbetet asnjëherë hatri kur unë e përmend, dhe shumë të tjerë kemi disa probleme, disa ngarkesa që vijnë nga e kaluara, ndërsa LRI-ja përfaqëson një forcë krejt të re, një solidaritet të jashtëzakonshëm. Ata janë të rinj mjaft të ditur, të cilët shkëlqejnë në mësime, shkëlqejnë në solidaritetin me njëri-tjetrin dhe kanë një përvojë të admirueshme dhe të mrekullueshme.

Në fakt, jua bëra këtë pyetje për 10 vjetët e ardhshëm për LSI-në, z. Meta, sepse ne kemi dy parti të majta.

Ata do ta përcaktojnë.

Sigurisht, ju e thatë kështu. Në fakt, ne kemi dy parti të majta, por LSI-ja vazhdimisht ka marrë pikë, sidomos gjatë viteve të fundit ka arritur në një parti me potenciale dhe nuk ka pasur shumë probleme, siç kanë pasur dy partitë e tjera të mëdha, ndaj ju pyeta si e shikoni të ardhmen. Edhe të ardhmen e PS-së, nëse do të keni diçka. Partitë, gjithsesi, kanë nevojë për ideologji, apo jo?!

Patjetër që mendoj se kanë nevojë, më shumë sesa thjesht për një ideologji, për ide të qarta dhe strategjike, sepse ideologjizimi shpesh të nxjerr nga realiteti dhe të bën viktimë, do të thosha, të zgjidhjeve, të cilave u ka kaluar koha. Natyrisht që ka disa parime, principe, të cilat nuk vjetrohen asnjëherë. Mendoj se solidariteti dhe drejtësia sociale gjithmonë mbeten të pandryshuara dhe mjaft të rëndësishme për një shoqëri të qëndrueshme, për një shoqëri me vlera morale, për një shoqëri të drejtë, për një shoqëri që prodhon siguri dhe besim në vetvete dhe për brezat e ardhshëm. Është shumë e rëndësishme që partitë gjithmonë të punojnë për zgjidhje.

E drejtë. Pra, nuk është se e shikoni shumë LSI-në si një parti ideologjike, po ku ndryshon ajo nga Partia Socialiste?

Mendoj se LSI-ja ka disa ide shumë të qarta; është një forcë e cila gjithnjë ka qenë e orientuar për të kontribuuar për integrimin evropian të vendit dhe nuk ka asnjë çështje, asnjë debat për këto çështje të rëndësishme me të cilat Shqipëria është ndeshur në të kaluarën apo që ndeshet aktualisht dhe ku pozicioni i LSI-së nuk ka qenë i qartë dhe i kristaltë në këtë drejtim. Pa dyshim që LSI-ja, edhe pse dikush mund ta shikojë në një mënyrë apo në një tjetër, mendoj se ka një kolegjialitet, i cili garanton edhe debat të brendshëm, por edhe një kompaktësi e një qartësi të veprimit politik të organizimit të saj dhe të solidaritetit brenda saj.

Ku ndryshon me PS-në? A mund të na e thoni shkurtimisht?

Nuk është kjo detyra ime. Këtë mund ta gjykojë gjithsecili, por ne jemi komplementarë me Partinë Socialiste dhe jemi në një koalicion më të natyrshëm sesa kemi qenë përpara vitit 2013.

Duket që nga pikëpamja ideologjike nuk është se partitë ndryshojnë, z. Meta, duke futur këtu edhe parti të tjera?

Nuk dëshiroj të hyj në këtë çështje dhe të them se ne jemi një parti me principe më të forta sesa Partia Socialiste dhe të njëjtën gjë do të fillojë të thotë edhe dikush nga Partia Socialiste etj. Këto janë histori që u takojnë qytetarëve t’i gjykojnë.

A e keni parë z. Rama që kohë pas kohe, që një herë në tri-katër ditë ai shpërndan triska partie për njerëzit në nevojë, për njerëzit që kërkojnë punë, asistencë...

Mendoj se kështu e pasqyroni ju.

Jo, e thonë vetë ata. “Kisha nevojë dhe erdha do të anëtarësohem këtu”, thoshin anëtarët e Beratit.

Nuk e kam ndjekur më vëmendje.

Doli një grua aty si shenjtore dhe jepte ndihma të mëdha. Ishte një goxha grua dhe i kishte ndihmuar edhe ata të bënin be dhe të qanin për të. Ajo grua i kishte ndihmuar shumë me asistencë sociale dhe ata të gjithë po bëheshin anëtarë të PS-së. Po rritej PS-ja, ç’mendoni për këtë mënyrë?

Nuk kam asnjë arsye për të komentuar diçka që ju e komentoni. Ata e shohin dhe e komentojnë në mënyra të ndryshme. Është më se legjitime që një forcë politike të punojë për të shtuar anëtarësinë e saj. Është normale.

Duket që e keni të vështirë, se një praktikë të tillë, jo mot a mot, por e ndiqni edhe ju, z. Meta. Domethënë, dyert e partive janë kthyer edhe në zyra pune. Kjo praktikë sikur është pak e vjetër, edhe pse ne jemi popull në hall dhe shpesh nuk kemi bukën e përditshme...

Mendoj se gjithmonë ka vend për të reflektuar dhe për t’u përmirësuar, por partitë më mirë të takohen me qytetarët, me anëtarët, me simpatizantët sesa të mbyllen ne vetvete dhe t’u kthejnë kurrizin atyre.

Jo vetëm për t’i kthyer në target të partive vendet e punës, sepse do të ktheheshim në kohën e...

Jam shumë dakord me ju. Dua theksoj, sepse e dëgjova edhe më parë, jo klientelizmi, përralla të tilla, të cilat mendoj se amplifikohen më shumë, se një nga vlerësimet më pozitive edhe të Komisionit Europian, edhe të Bashkimit Europian, lidhur me reformat e këtyre dy vjetëve në Shqipëri është ai që ka të bëjë me administratën publike. Pra, transparenca në këtë drejtim, unë e di që ju nuk e pëlqeni këtë gjë dhe jeni një mosbesues i palodhur, ka qenë dhe mbetet maksimale, si asnjëherë tjetër më parë. Natyrisht që ka shumë vend për ta përmirësuar më tej, por disa gjëra kanë ndryshuar në mënyrë serioze, do të thosha, edhe në këtë drejtim.

Z. Meta, John Kerry pritet ta vizitojë për disa orë Shqipërinë të dielën. Vizitat, si kjo e z. Kerry, i bëjnë shpesh amerikanët në vende si i yni, por ne i japim përmasa shumë të mëdha dhe pjesët e gojëve që flasin këtu në këtë vend, zakonisht nëpër tavolina, nëpër tryeza, thonë se John Kerry nuk do ta takojë Ilir Metën. Çfarë mendoni ju?

Së pari, unë do të thosha se kjo është një vizitë shumë pozitive, që ishte e parashikuar të ndodhte edhe më parë kur ai e vizitoi Kosovën. Pra, është një gjë shumë pozitive që do të vijë Sekretari Amerikan i Shtetit. Tani nuk përbën më një ngjarje të jashtëzakonshme ardhja e një Sekretari Shteti, sikurse kur erdhi Sekretari i Shtetit Bejker, apo Sekretarja e Shtetit, Albright në vitin 2000, pas gati 10 vjetësh, apo siç ishte edhe ardhja e Presidentit Bush ku ai nga Tirana shpalli edhe pavarësinë e Kosovës, e kështu me radhë. Pa dyshim që të gjitha këto vizita, vizita e sekretarit Poëell, vizita e sekretares Klinton, vizita e sekretarit Kerry janë tregues të marrëdhënieve të vazhdueshme dhe, natyrisht që, një personalitet i tillëi një vendi që ndeshet me shumë sfida, shumë më të mëdha se para disa vitesh, ndërkombëtare, globale, nuk mundet të bëjë një vizitë edhe më të gjatë. Por besoj se mesazhet që do të vijnë nga kjo vizitë, do të jenë tepër të rëndësishme dhe pozitive për marrëdhëniet tona me Shtetet e Bashkuara të Amerikës, por dhe për marrëdhëniet tona të mëtejshme me BE-në. Unë mendoj se kjo është gjëja më e rëndësishme.

Ju do ta takoni atë? Punën për muhaxhedinët do ta zgjidhë me z. Edi Rama, apo jo?

Kjo është gjëja më e parëndësishme dhe, natyrisht që, nuk është lajm nëse unë do të takohesha apo jo me të, për arsye se nuk është Kryetari i Kongresit të Shteteve të Bashkuara të Amerikës. Unë kam dëgjuar, nga ata analistët që keni aq për zemër, që Kancelaria Merkel erdhi në Shqipëri, sepse nuk donte të takohej me z. Meta. Ndërkohë pas Shqipërisë shkoi dhe në Beograd ku qëndroi më gjatë dhe nuk u takua me Kryetarin e Parlamentit të Serbisë, sepse është më se normale. Lajm do të ishte nëse Kryetari i Parlamentit të Gjermanisë vjen në Shqipëri dhe nuk takohet me z. Meta. Unë mendoj se provincializma të tilla, jo vetëm në politikë, por dhe në gazetari, dhe në media duhet të marrin fund, sepse u bëmë 25 vjet në marrëdhënie me të huajt, në marrëdhënie me personalitete të ndryshme. Pra, është krijuar një eksperiencë mjaft e konsoliduar. Ne duhet të merremi me mesazhin. Mendoj se mesazhi do të vijë nga kjo vizitë që është shumë i rëndësishëm.

Sondazh

Më shumë në këtë kategori: « “Ramën e mban në këmbë vetëm inati”
PORTRETI/ Fatos Nano në sytë e amerikanëve: Një Kafshë Sociale, që shijon bredhjet në orët e vona të natës…Shumë serioz kur bën shaka »
Article Logic
Execution time: 0.034914970397949
array(1) { ["section"]=> string(93) "meta-president-ne-vitin-2017-ekziston-mundesia-per-kedo-qe-eshte-40-vjec-dhe-ka-ambicie-32366" }