"Pushuesit nga kosova vijnë në Shqipëri se janë fukarenj", gazetarja i përvishet mirë Mero Bazes: Shut the fu.k up

Publikuar tek: fcb-bomb, më 12:52 21-07-2017

Një shkrim i publikuar së fundmi nga gazetari Mero Baze lidhur me pushuesit nga Kosova në Shqipëri ka irrituar pa masë një “homologen” e tij.

Gazetarja kosovare, Kimete Berisha i është “përveshur” keq Bazes, duke e cilësuar atë si ish-anëtar i sigurimit të Enver Hoxhës dhe një person që do ishte në gjendje edhe ta shiste vendin e tij vetëm për para.

Mero Baze në këtë shkrim shkruante se në brigjet shqiptare vijnë për pushime vetëm kosovarë të varfër dhe fukarenj, frazë kjo e cila është cilësuar e turpshme për tu thënë nga një shqiptar i Shqipërisë.

Për të kuptuar më tepër nga replikt mes tyre po ju sjellim dy reagimet e tyre të plota.

REAGIMI I PLOTË I GAZETARES:

‘Çorapës’ i iku vegza!

Gazetarit të ish sigurimit të Enver Hoxhës, thuajini se shqiptarët e Kosovës janë dergjur dhe disa prej tyre janë tredhur nëpër burgjet serbe për idealin e Shqipërisë kur u ka kushtuar më së shtrenjti, me jetë. Disa s’ka dalë prej burgut të gjallē.

E ty, thuaj, s’po të vjen turp, po na ulë aq poshtë, sa po e mat dashurinë tonë ndaj atdheut me plazhe e me bukë, dhe po thua se shqiptarët e Kosovës shkojnë në pushime në Shqipëri sepse është më lirë, sepse janë fukarenj dhe e marrin miellin me vete, e jo pse e duan Shqipërinë.

Tek e fundit ku e di ti çfarë është dashuria, ti maestro i urrejtjes njerëzore dhe i neverisë.
Ti je si ai qeni që e do veç pjellën e vet.

Ti vetëm ‘leh’ kur na thua neve ‘mos ejani për patriotizëm në plazhet tona’, thuajse Shqipërinë ta ka lënë baba amanet.

Po kush hamami je ti të na tregosh neve motivin për çka vimë ne në Shqipëri.
A vimë për patriotizëm a për çka vimë ne është punë e jona.
Mos na e shpjego Shqipërinë të cilën e njohim, dhe e kemi dashur edhe pa e njohur, dhe e duam fort edhe pasi që e kemi parë çfarë fytyre ka.

Zoti yt janë paratë, për të cilat ti e shet Shqipërinë, me ta lënë në dorë.

Pse na quan ti neve të varfër!
Qysh u bëre ti i pasur, aq i pasur u bë b.th. jote e madhe sa krejt Kosova po të duket e varfër!

Pse na thua se e marrim bukën me vete në pushime!
Ku e di ti që e marrim bukën me vete!
Ende e bën punën e spiunit që e di çfarë kanë njerëzit nëpër valixhe, a çka!
Çka ka të keqe buka, tek e fundit!

Ani çka që kërkojmë çmime të lira!
Jo ne varfanjakët, siç na quan ti njeri pa mëshirë dhe pa karakter, po s’ka njeri i pasur në botë që nuk kërkon çmime më të ulta në treg.

Nuk është turp me qenë i varfër në një shtet të varfër, si Ne.
Turp është me qenë i pasur si Ti.

Shumë hotele në bregdetin shqiptar ua ndalojnë larjen në pishina shqiptarëve të Kosovës, u thonë se në to mund të lahen vetëm ‘të huajt’…dhe serbët.

Çka është gjithë ky nënçmim i zhgjyranave të Durrësit ndaj nesh!
A është e mundur të jetë ‘urrejtje’ e organizuar kjo!

Po Ti bregdetin e ke parë veç me dylbi të Ali Pashës.
Ne si fëmijë e dimë çka janë pushimet në bregdet, derisa ti dhe çiftat t’u keni punu gjithë verën nëpër ara, s’keni dëgju radio as s’keni parë televizor, keni lexu veç për Stalinin dhe për Jeseninin, e në mbrëmje i keni spiunu çobanët te xhaxhi peder.

Kush jeni ju që na nënçmoni dhe na urreni kaq shumë!
I ndani pushuesit: në kosovarë dhe të huaj.
Ju që edhe bukën e keni fetish.
Ju që Zotin e keni para.

Njëqind herë ua bën shqiptari i Kosovës një pyetje, nuk përgjigjen, e bëhen kinse s’po kuptojmë, ndërsa çdo kafene dhe çdo klub i Shqipërisë mbahet me muzikën e reperëve shqiptarë të Kosovës.
Dyfytyrësi.

Ju duhet me kuptu se nuk blihet dashuria në Kosovë, siç shitet tek Ju në aksham pazar.

Ne për dashuri ndaj jush e kemi dhënë jetën.

P.S. Mos i lejoni me ju nënçmu.
Flisni dialektin tuaj, nëse nuk u kuptojnë, le ta gjejnë një përkthyes shqip-shqip.
Shkoni, mos iu ndani Shqipërisë, se është vendi ynë.
Jemi Një popull.

E ti Çorapë, ‘Shut the fu.k up’.
(Edhe burgun e Smrekovnicës mbas luftës në librin tënd e ke përshkruar që ka qenë si ‘hotel’ për të burgosurit shqiptarë gjatë luftës, kaq i pafytyrë që je).

SHKRIMI I MERO BAZES:

Po bëhet një ritual i përvitshëm përdorimi i sezonit veror për sulme ndaj turizmit të Shqipërisë, në disa media të Kosovës.

Disa thonë është çështje marketingu e kompanive që duan të dërgojnë njerëz në Turqi, apo bregdetin e Malit të Zi. Të tjerë mendojnë se turizmi i Shqipërisë i meriton sharjet, dhe si ilustrim të thonë, që e ka sharë dhe Sonila. Mund të jenë të dyja nga pak.

Vetëm nëse lexon disa portale të Kosovës muajin e fundit, shikon se ka një tendencë të theksimit të një fryme antikosovare, që sipas tyre gjendet në Shqipëri dhe shkohet pastaj deri në thirrje për ta bojkotuar bregdetin e Shqipërisë.

Rasti i fundit me spekulimin e autobusëve të Kosovës në Durrës, është banal, por reflekton dëshirën për t’i ilustruar skenarët e sulmit, edhe me doza racizimi.

Të pushosh në Shqipëri, nuk është një mrekulli, dhe mbi të gjitha, nuk duhet të jetë kurrsesi një patriotizëm. Unë pushoj rregullisht në Shqipëri, por jo për patriotizëm. Pushoj se këtu kam gjetur tipin e turizmit që më shlodh, duke kombinuar detin me malin dhe me udhëtimet.

Plazhet nuk janë tërësisht të pastra, por ama ka plazhe që janë dhe shumë të pastra dhe më standart ndërkombëtar. Plazhet e Rivierës shqiptare, që nga “Pema e Thatë” në Ksamil, në Krorëz e Kakome, Gjipe dhe Karaburun e deri në Sazan, janë ndoshta më të mrekullueshmet e Mesdheut.

Por dhe mu në mes të zonës jo aq elitare si Golemi, mund të gjesh “Playa del Esta”, një super plazh me rërë me standart të njëjtë që mund ta gjesh në Florida.

Hotelet nuk janë shumë të mira, por dhe në vendet më pak jo elitare, gjen hotele që janë të mrekullueshme, që nga Shëngjini deri në Sarandë.

Në vendin më të keq në Golem për shembull, mund të gjeni një hotel si “Floëers”, që ka 130 ditë të pronotuara në vit nga turistë të huaj dhe që janë të gjithë të kënaqur, një  ishull parajse që ka krijuar me aq mund investitori shqiptar.

Drita dhe ujë nuk ka gjithandej, siç ka në Francë apo Itali, por investimet në këtë pikë janë të pakrahasueshme me vite më parë, kur nuk kishte kaq shumë ankesa.

Dhe atje ku shteti nuk ka arritur akoma, investitorët bëjnë super sakrifica. “Boungovile bay” në Sarandë, është një resort në mes të katrahurës së ndërtimeve dhe betonit të atij qyteti, por i duhet të blejë rreth 400 dollarë ujë në ditë për pushuesit, vetëm që të ruajë standartin e një resorti pa asnjë mungesë.

Dhe ky është i vetmi gjest patriotik për turizmin shqiptar, gjesti i mbijetesës pa fitim nga investitorët, për t’ia dalë ëndrrës së tyre.

Kultura e turizmit tek mikpritësit shqiptarë, shpesh është e mangët, por po u nise të bësh sherr, e jo të pushosh, do ta gjesh dikë patjetër, që është gati të bëjë sherr me ty.

E vërtetë është edhe se turisti i varfër i Kosovës, nuk është shumë i pëlqyer, dhe kjo duhet thënë pa doreza. Kjo mungesë preference, nuk vjen se është nga Kosova, por se shumë pak vetë janë të gatshëm të lëshojnë një dhomë për tre- katër vetë, për vetëm dhjetë euro, dhe të përballen me një destabilizim të saj, pas ikjes.

Është thjesht nervozizëm që vjen nga mungesa e fitimit që ke nga një turist i varfër. Njësoj do nervozoheshin dhe nëse një kërkesë e tillë do vinte nga italianë, grekë, apo hungarezë.

Në Shqipëri pushojnë ata që duan të pushojnë dhe që dinë të pushojnë këtu. Është diçka që të ngjit, ose jo.

Mos u shqetësoni as nga sulmet ndaj turizmit shqiptar dhe as mos u ngazëlleni nga turizmi patriotik. Ai nuk ekziston, përveçse në përrallat e qaramanëve dhe fjalimet e delirantëve.

Ne kemi një bum turizmi së paku vitet e fundit, se jemi ende të lirë. Jemi ende me dhoma dhjetë euro mesatarisht për çdo person, jemi me plazhe ende të lira, dhe me mundësi që turisti i varfër i Kosovës, Maqedonisë, Hungarisë, Ukrainës, Polonisë dhe Çekisë, të vijë deri këtu.

Varfëria është ende biznesi i turizmit tonë dhe jo luksi. Saranda po mbushet nga italianë të jugut, nga polakë, çekë etj. Bregdeti i Durrësit dhe Golemit po ashtu. Vlora po rizgjohet si destinacion edhe i pjesës adriatike të saj.

Është ndoshta koha më e mirë e turizmit shqiptar në vite, që edhe për shkak të krizave politike në Egjipt, Tunizi, Turqi etj,  janë kthyer nga ne.

Jemi ende të lirë dhe jemi ende treg për të varfërit, për ata që shkojnë në det, ndoshta dhe për herë të parë, për ata që duan të krijojnë një ritual të zbavitjes së familjes në jetën e tyre, që u ka munguar më parë.

Për fatin tonë të mirë, nuk kemi turizëm luksoz. Se po ta kishim, jo më turistë nga Kosova e Maqedonia, por as shumica nga ne, që e kemi detin tek këmbët, s’do ta kishim prekur dot. Gëzojuni varfërisë dhe shijojeni Shqipërinë, sa është ende e lirë dhe e varfër, siç është Kosova, Maqedonia, Mal i Zi, Ukraina etj.

Nuk ju kërkojmë të bëheni patriotë, pasi askush nuk po vjen për patriotizëm në plazh. Dhe nuk duhet të vijë. Për patriotizëm vishen rroba ushtarake dhe jo rroba plazhi. Kur Shqipëria të bëhet e pasur, nuk ju ndihmojmë dot.

Kjo thirrje nuk vlen për ata që janë të pasur, që vijnë nga Kosova në vilat e Lalzit apo në vila një milionë euroshe në Sarandë. Ata njësoj e kanë të shkojnë dhe në bregdetin e Francës apo Italisë, se kanë aq para. Vlen për ata që marrin bukë me vete, kalamajtë në veturë dhe duan me pa detin.

Ejani shijojeni se është ende i lirë. Dhe në u ndodhtë diçka që nuk ju pëlqen, apo ju mërzit, kafshoni buzën. Nuk është arsye të shash Shqipërinë, pse të kanë shku pushimet keq. Nuk ka nevojë të jeni patriotë për të ardhur këtu.

Tani për tani na mjafton që jeni ende të varfër, si ne. Po ishit dhe patriotë, do ishte mirë të mos shanit, por nuk po ua kërkojmë doemos.

Votoni kryebashkiakun tuaj: Kush punon mirë, kush është i korruptuar

Emri / Bashkia
Punoi mirë
I korruptuar

Ju lutem, për të votuar kryetarin e bashkisë klikoni Qarkun përkatës në hartë!

Sondazh

Më shumë në këtë kategori: « “Po, marr lekë, pafund lekë... Për të kritikuar Ramën marr 100 mijë euro nga Basha”, demokrati i njohur përgjigjet njëherë e mirë
U lodh në garën për deputet, ja cili është profesioni i ri që po provon Luan Rama me mikrofon në dorë »
Article Logic
Execution time: 0.10629415512085
array(1) { ["section"]=> string(116) "pushuesit-nga-kosova-vijne-ne-shqiperi-se-jane-fukarenj-gazetarja-i-pervishet-mire-mero-bazes-shut-the-fu-k-up-86872" }