Rama reagon për fenë në shkolla: Është komentuar gabimisht, po punojmë me Observatorin e Parisit

Publikuar tek: politike, më 21:51 11-04-2016 Rama reagon për fenë në shkolla: Është komentuar gabimisht, po punojmë me Observatorin e Parisit

Kryeministri Edi Rama ka reaguar lidhur me debatin që është ngritur dy ditët e fundit për idenë e të mësuarit të fesë në shkollë, apo siç ai e quan “të mësuarit mbi fenë në shkolla”. Sipas Ramës, ideja e tij nuk ka lidhje me çka është komentuar, duke theksuar se nuk do të cënojë laicitetin e shkollës.

Për Ramën, personi që e ka kuptuar më së miri idenë e tij është Ardian Vehbiu, komentin e të cilit e ka postuar në faqen e tij në “Facebook”. Ai shkruan se qeveria po bashkëpunim ngushtë për këtë projekt me Observatorin e Laicitetit në Paris.

Postimi i Edi Ramës:

Ideja e të mësuarit mbi fenë në shkolla, është saktësisht siç e ka përshkruar Ardian Vehbiu në shkrimin bashkëlidhur më poshtë.

Kjo ide, s'ka asnjë lidhje me çka është komentuar fare gabimisht, si mësim i fesë në shkollë. Është një program që nuk do cënojë kurresesi laicitetin e shkollës. Ai do të pajisë të rinjtë qysh në shkollë me disa njohuri bazë, për të kultivuar respektin për besimin e tjetrit dhe për të mos rënë pre e rrjeteve të propagandës ekstremiste, në emër të një feje apo kundër një feje tjetër.

Siç e thotë edhe Ardian Vehbiu, një program i tillë do të kërkojë kohë të konsiderueshme, vite, për të dhënë fryte pasi të jetë konsoliduar dhe përfshirë plotësisht në kurrikulat shkollore. Sidoqoftë, përtej shqetësimeve apo akuzave të ngritura mbi keqkuptimin e momentit, "vula e sigurisë" së këtij programi është fakti se po përgatitet, qysh në bërthamën e vet, në bashkëpunim të ngushtë me Observatorin e Laicitetit në Paris:

NË SHKOLLA, STUDIM JO I FESË POR I HISTORISË SË FEVE

Nga Ardian Vehbiu, 11 Prill 2016

Kryeministri Rama paska hedhur idenë për studimin e fesë në shkollat e republikës, çka është pritur me kundërshtim dhe skepticizëm nga shumë anë.

Disa media kanë folur për një futje të “mësimit të fesë” në shkolla, gjë që nuk më duket e saktë.

Në mësimin e fesë, nxënësit mësojnë për fenë e tyre; përkundrazi, ideja e kryeministrit, që përsiatet prej kohësh në Europë, është që në shkolla nxënësit të mësojnë për fenë e tjetrit.

Mes pështjellimit dhe formulimeve të pasakta, kam frikë se ideja e kryeministrit përfundoi në një batutë për t’u kundërshtuar me batuta të tjera.

Nuk besoj se sot në Shqipëri mund të kërkojë kushfutjen e fesë në shkollat publike, qoftë ai edhe kryeministri vetë; por vetëm studimin e historisë së feve, diçka krejt tjetër.

Njohuritë për fetë, që nuk duhen ngatërruar me besimin fetar, janë bërë tashmë të domosdoshme për formimin qytetar europian (dhe jo vetëm); në rrethanat kur fetë e ndryshme ballafaqohen mes tyre, por edhe me ateizmin, agnosticizmin dhe misticizmin haptazi dhe fshehurazi.

Brezi im u rrit në një mjedis fetarisht të sterilizuar; por kjo sot na krijon jo pak vështirësi, në përpjekjet për të komunikuar me kulturën, në Perëndim dhe në Lindje.

Brezat më të rinj se imi, që kushedi i ekspozohen trysnive nga burime të radikalizuara të dijes fetare, ndeshin në vështirësi të një lloji tjetër: atje ku ne më të vjetrit mezi i dallojmë diferencat dhe fillesat e ndryshme kulturore, atyre më të rinjve këto mund t’u duken arsye të mjaftueshme për konflikt moral dhe jo vetëm.

Të dyja këto patologji ekspozojnë ndaj rreziqeve dhe konflikteve sociale, sidomos në afat të gjatë.

Padija që shpesh kemi për fenë e tjetrit, por edhe fenë tek e cila thjesht nuk besojmë, shndërrohet në burim përçarjeje dhe dhune.

Të paditur, e shohim Tjetrin si karikaturë, ose veç duke ia lexuar shenjat e jashtme.

Tjetër punë si do të realizohet njohja e fesë së Tjetrit, ose kush do t’i mësojë mësuesit dhe kush do t’i edukojë edukatorët: historia e feve është displinë komplekse dhe e vështirë për t’u rrokur, përtej klisheve pseudo-ekumenike ose kurioziteteve antropologjike.Vetëm vullneti i mirë nuk mjafton; puna e filluar tani, do të japë frytet e saj shumë më vonë.

Sondazh

Më shumë në këtë kategori: « LSI fillon të flasë publikisht: Atentat ekologjik dhe institucional kundër parkut të liqenit
Raporti i Freedom House: Shqipëria s’ka ndryshuar, vazhdon të jetë qeveri tranzicioni »
Article Logic
Execution time: 0.020055055618286
array(1) { ["section"]=> string(100) "rama-reagon-per-fene-ne-shkolla-eshte-komentuar-gabimisht-po-punojme-me-observatorin-e-parisit-37429" }