Tabaku akuza ndaj qeverisë Rama: Përgjysmimi i çmimit të tokës tek Teatri, pjesë e planit mafioz për ndërtimin e 6 kullave

Publikuar tek: politike, më 14:32 12-07-2018 Tabaku akuza ndaj qeverisë Rama: Përgjysmimi i çmimit të tokës tek Teatri, pjesë e planit mafioz për ndërtimin e 6 kullave Jorida Tabaku

Partia Demokratike ka vijuar akuzat ndaj qeverisë Rama për çështjen e Teatrit.

Deputetja Jorida Tabaku u shpreh se kryeministri Rama po përdor Fusha shpk si kompani guackë për pastrimin e parave të pista të drogës dhe korrupsionit.

Tabaku tha se PD ka paraqitur fakte lidhur se kryeministri i ka dhënë kësaj kompanie rreth 80 milionë tendera publikë.

Tabaku shtoi se, Rama nuk ka bërë kurrë publik pazarin me Fusha shpk për shtëpinë luksoze në Surrel, e deklaruar se ka kushtuar 400 mijë euro.

Në vijim të akuzave, deputetja e PD tha se me vendim qeveria është vendosur përgjysmimi i çmimit të tokës tek Teatri.

“Sot ne po sjellim prova sesi skema mafioze e Edi Ramës për të marrë tokën tek Teatri është e vjetër, e mirëmenduar dhe e vënë në funksionim pas marrjes së Bashkisë nga Erion Veliaj”.

Deklarata e plotë:
Prej disa ditësh Partia Demokratike ka vënë në dispozicion të publikut fakte sesi Edi Rama po përdor Fusha shpk si kompani guackë për pastrimin e parave të pista të drogës dhe korrupsionit.

Ne kemi paraqitur me fakte sesi në 4 vjet, Edi Rama i dha Fusha shpk rreth 80 milionë tendera publikë, pasi kjo kompani bëri në të zezë punimet për të shndërruar kryeministrinë në një pallat luksoz për Ramën.

Ne vumë në dukje se Edi Rama nuk ka bërë kurrë publik pazarin me Fusha shpk për shtëpinë luksoze në Surrel, e deklaruar se ka kushtuar 400 mijë euro.

Ne provuam se Fusha shpk duhet të hetohet nga ligji Antimafia për shkak të lidhjeve të afërta të gjakut me trafikantin ndërkombëtar të drogës, Sulejman Fusha, i cili është vëllai i ish kryeprokurorit të Tiranës, Petrit Fusha.

Është ky person që deri pak muaj më parë drejtonte prokurorinë e Tiranës dhe që ka mbyllur dosjet penale të Veliajt dhe ministrave Ahmetaj e Gjiknuri. Prej këtij të fundit ka marrë tani koncesionin prej 125 milionë euro të hidrocentralit të Kalivaçit dhe ndërtimin e Bulevardit të Vlorës.

Sot ne po sjellim prova sesi skema mafioze e Edi Ramës për të marrë tokën tek Teatri është e vjetër, e mirëmenduar dhe e vënë në funksionim pas marrjes së Bashkisë nga Erion Veliaj.

Sapo Fusha shpk u bë pronar i një pjese toke pranë zonës së Teatrit, qeveria e Edi Ramës ka përgjysmuar çmimin e vlerës së truallit në Qendrën Historike, në zemër të kryeqytetit.

Në vitin 2016, vit kur Fusha u bë pronar, Edi Rama e zhvlerësoi pronën nga 1 milionë e 200 mijë lekë për m2 që ishte në vitin 2012 në më pak se 670 mijë lekë të vjetra për m2.

Por mafies Rama-Fusha- Veliaj as kjo nuk i mjafton.

Tani kanë nisur të kërcënojnë pronarët e ligjshëm, të cilët nuk duan t’ua shesin pronën me një çmim qesharak një kompanie, prapa të cilës qëndron kryeministri i vendit, i cili llogaritet të fitojë jo më pak se 205 milionë euro nga kullat që ka planifikuar të ndërtojë për pastrimin e parave të pista të drogës dhe korrupsionit.

Plani mafioz i Edi Ramës ka edhe një aspekt tjetër skandaloz!

Ligji i miratuar në parlament i fal Fusha shpk 2100 metra2, pronë e Bashkisë së Tiranës, në kundërshtim me ligjin për qeverisjen vendore.

E vetmja mënyrë që Erion Veliaj t’ia japë këtë pronë është ta tjetërsojë me vendim në Këshillin Bashkiak.

Çdo akt i ndryshëm nga ky çon në burg këdo që merr përsipër të falë pronat e qytetit tek kompania private e kryeministrit, përfshirë edhe vetë kryetarin e bashkisë Erion Veliaj!

Transparenca jonë për këtë akt mafioz do të vazhdojë me këmbëngulje, pavarësisht tendencës së mediave kryesore në vend për të censuruar opozitën!

Partia Demokratike, qytetarët që duan ruajtjen e vlerave kulturore, si pjesë e identitetit tonë europian, qytetarët që duan Tiranën, qytetarët që nuk pranojnë grabitjen dhe qeverisjen nga mafia nuk do të lejojnë triumfin e së keqes!

 

Sondazh

Më shumë në këtë kategori: « Taulant Balla tejet entuziast për takimin: Rama ktheu Trump në mbështetës kuq e zi
Jo vetëm FOTO por edhe VIDEO, shikoni si i flet ‘me këmbë e duar’ Rama Presidentit Trump »
Article Logic
Execution time: 0.0044610500335693
array(1) { ["section"]=> string(127) "tabaku-akuza-ndaj-qeverise-rama-pergjysmimi-i-cmimit-te-tokes-tek-teatri-pjese-e-planit-mafioz-per-ndertimin-e-6-kullave-127664" }