Federata Shqiptare e Futbollit është tërhequr nga vendimi për sloganin që do të shoqërojë autobusin e Kombëtares gjatë Kampionatit Europian.
Me anë të një njoftimi, FSHF shprehet se në autobusin e kuqezinjve do të vendoset slogani “O sa mirë me qenë shqiptar!”, i përzgjedhur nga tifozët në faqen zyrtare të UEFA-s.
Ishte presidenti Armand Duka ai që njoftoi pak ditë më parë se ishte përzgjedhur slogani “Ti Shqipëri më jep nder”, çka shkaktoi reagim te tifozët, jo për vargjet e poetit të madh Naim Frashërit, por për faktin se nuk ishin pyetur për këtë vendim.
Gjithsesi, tani çdo gjë është zyrtare dhe përfundimtare, “O sa mirë me qenë shqiptar!” është slogani që do të shoqërojë skuadrën tonë në Euro 2016.
