Basha në ish kampin e internimit në Tepelenë: Ka ardhur koha që kulti i krimit i trashëguar nga diktatura, të marrë fund

Publikuar tek: aktualitet, më 12:13 12-02-2019 Basha në ish kampin e internimit në Tepelenë: Ka ardhur koha që kulti i krimit i trashëguar nga diktatura, të marrë fund

Kryetari i Partisë Demokratike, Lulzim Basha, vizitoi kampin e internimit të Tepelenës, i shoqëruar nga disa të mbijetuar të një prej kampeve më të tmerrshëm të diktaturës komuniste.

Sipas dokumentacionit të paplotë që ekziston, më shumë se 3 mijë veta u mbajtën në këtë kamp nga viti 1949 deri në vitin 1953, kryesisht gra, pleq e fëmijë.

Simon Miraka, i mbijetuar i kampit të Tepelenës, i tregoi kreut të PD për kushtet e shfarosjes që ekzistonin në kamp.

“Kazanët e gjellës ishin fuçia që u kishin shërbyer italianëve për naftë. I prenë ato, i sharruan dhe i bënë kazanë. Ai spirilëngu, ajo gjella e famshme, e quajtur gjellë, se gjellë s’ishte, kur shkonin njerëzit për ta marrë me tasa a gaveta, ishte gjithë pisllëk e naftë. Këto shkaktuan epidemi, zgjebën, kolerën dhe sëmundje të ndryshme. Vdekjet filluan me 32 vetat e parë dhe vazhduan këtu me 300 fëmijë, mosha nga 6 muaj deri në 3-4 vjeç”.

Kryetari i opozitës tha se kushtet e këtij kampi u ngritën sipas parimit të shfarosjes, i cili u zbatua më herët edhe nga nazistët.

“Nga pikëpamja ligjore ky është krim kundër njerëzimit, sepse, në qoftë se 1 në 3 humbën jetën për shkak të kushteve qëllimisht shfarosëse, çnjerëzore, atëherë këtu bëhet fjalë për kamp shfarosjeje. Duke qenë se gjithçka u zhvillua edhe pa legjislacionin që diktatura e përdorte për të burgosur dhe për të ekzekutuar kundërshtarët e regjimit dhe u drejtua kryesisht kundër familjarëve të tyre, nuk ka asnjë diskutim se edhe motivi i xhelatëve që i sollën këtu, edhe mënyra e veprimit këtu kishte një qëllim, shfarosjen e tyre”.

Lideri i opozitës vuri në dukje gatishmërinë e PD për të ndërmarrë nisma të mëtejshme parlamentare dhe publike për dënimin e krimeve të komunizmit dhe shprehu besimin se në këtë përpjekje PD dhe opozita nuk do të ishin vetëm, por bashkë me shumë faktorë të shoqërisë, pasi kishte ardhur koha që kulti i krimit të marrë fund.

 

Sondazh

Article Logic
Execution time: 0.0045599937438965
array(1) { ["section"]=> string(125) "basha-ne-ish-kampin-e-internimit-ne-tepelene-ka-ardhur-koha-qe-kulti-i-krimit-i-trasheguar-nga-diktatura-te-marre-fund-152478" }