Bllokimi i llogarive Telecom, reagon ashpër Kurti: Me qeverinë koti, kriminelët dolën nga skutat

Publikuar tek: rajon, më 14:54 16-07-2020 Bllokimi i llogarive Telecom, reagon ashpër Kurti: Me qeverinë koti, kriminelët dolën nga skutat

Ish-kryeministri i Kosovës, Albin Kurti ka reaguar në lidhje me bllokimin e llogarive të kompanisë publike ‘Telecom’.

Me anë të një postimi në ‘Facebook’ Kurti tha se ndërrimi i qeverisë ka trimëruar kriminelët dhe zhvatësit e parasë publike.

Ai tha se pasojat e kësaj për Kosovën do të jenë të rënda, ndërsa është shprehur se ky krim është i pafalshëm.

Ndër të tjera ai shkruan se të gjithë përgjegjësit dihen me emër dhe mbiemër dhe do të përgjigjen, kur vendi të udhëhiqet nga një qeveri e përgjegjshme.

“Të gjithë përgjegjësit, e dihen me emër dhe mbiemër, do të përgjigjen, kur ky vend të udhëhiqet nga një qeveri e përgjegjshme, dhe kur sistemi i drejtësisë të lirohet nga kapja, krimi dhe korrupsioni. Dhe, kjo ditë nuk do të vonojë,” shkruan Kurti.

Reagimi i plotë:

Me qeverinë koti kriminelët dolën nga skutat

Ndërrimi i qeverisë trimëroi kriminelët dhe zhvatësit e pasurisë publike të të gjitha llojeve. Këtë e tregojnë ngjarjet e djeshme lidhur me Telekomin. Gjatë qeverisjes sonë 50 ditëshe, ata ishin strukur dhe nuk ndjeheshin të gjallë. Ishin të vetëdijshëm se me neve në qeveri, nuk kishin asnjë shpresë. Rishfaqja e tyre tani dhe në mënyrë kaq brutale dëshmon se qeverinë e paligjshme e konsiderojnë aleate të tyre. Ndryshe vështirë se do të kishin pasur guximin të lënë qytetarët dhe ekonominë e vendit pa komunikime jetike, duke rrënuar përfundimisht Telekomin e Kosovës.

Vetëm në vitin 2009, Telekomi i Kosovës i kishte dhënë dividentë buxhetit të shtetit në vlerë prej 200 milionë euro. Deri në vitin 2014, kjo shumë arriti gjithsej në 435 milionë euro. E gërryen nga brenda dhe e rjepën nga jashtë me kontrata të dëmshme vit pas viti. Plaçkitësve tash po u ndihmojnë edhe gjyqtarë që thyejnë rekordin për efikasitet në kohë pandemie teksa qindra mijëra lëndë janë pluhrosur nëpër sirtarë të kyçur në Pallatin e Drejtësisë. Zaten, kur krimineli e paditë viktimën dhe e fiton gjyqin, kjo do të thotë që ka gjykatës që janë bërë për burg.

Rrezikohet të mbesin pa shërbim më se 800.000 abonentë. Rrezikohet shembja e bërthamës së komunikimeve elektronike në vend, me pasoja edhe për operatorët tjerë. Rrezikohet krizë sociale (duke nxjerrë mijëra punëtorë me familjet e tyre në rrugë), krizë e sigurisë kombëtare (duke i kanosur shërbimet qeveritare, të policisë, ushtrisë, prokurorisë, emergjencës e inteligjencës), krizë ekonomike (duke cenuar komunikimin e ndërmarrësve dhe tregut), dhe krizë shëndetësore (duke gjymtuar shërbimet shëndetësore si psh. qasja në linjat 194 për 800.000 qytetarë), e gjithë kjo në kohë të emergjencës për shëndetin publik.

Në anën tjetër, operatori i dytë për nga madhësia në vend, është nxjerrë në shitje. Ndër blerës të interesuar është edhe Telekomi i Serbisë, i maskuar në konsorciume.

Pasojat do të jenë të rënda – ekonomike e sociale por edhe të sigurisë. Ky është një krim i pafalshëm. Të gjithë përgjegjësit, e dihen me emër dhe mbiemër, do të përgjigjen, kur ky vend të udhëhiqet nga një qeveri e përgjegjshme, dhe kur sistemi i drejtësisë të lirohet nga kapja, krimi dhe korrupsioni. Dhe, kjo ditë nuk do të vonojë.

108633957_915716272261591_8532801227075477456_o.jpg

Sondazh

Article Logic
Execution time: 0.010276079177856
array(1) { ["section"]=> string(100) "bllokimi-i-llogarive-telecom-reagon-ashper-kurti-me-qeverine-koti-kriminelet-dolen-nga-skutat-214012" }