Për Agjencinë e Legalizimit, Urbanizimit dhe Integrimit të Zonave/ Ndërtimeve Informale, ka nisur të shkruhet edhe në gjuhën e Homerit të Greqisë së lashtë.
Këtë e sjell në vëmendje vetë drejtori i ALUIZNI-t, Artan Lame i cili përpos faktit që shkruhet për agjencinë që ai drejton, s’ka lënë pa e vënë re edhe gabimin në emrin e institucionit të cilin kolegët grekë e shkruajnë “ALUIZMI”. Megjithatë, për Lamen, nuk është kjo më e rëndësishmja.
“S'kisha parë ndonjëherë të shkruhej në gjuhën e Homerit për problemet e ALUIZNI-t. Edhe këtë e arritëm! Bëhet fjalë për një shkrim rreth ecurisë pozitive të procesit të Legalizimeve në zonat e minoritetit grek në Jug të vendit, zona që i mbulon Drejtoria Rajonale Sarandë.
Gjuhë pas gjuhe, e kanë shkruar gabim emrin e institucionit "ALUIZMI", por s'ka gjë, e rëndësishme është që flitet pozitivisht (ju siguroj, se ma përkthyen)”, shkruan Lame ndërsa ndan faqen e gazetës që ka në përmbajtje artikullin.
