Kryeministri Edi Rama mori pjesë këtë të martë në Konferencën e III Kombëtare të Arsimit dhe Formimit Profesional, ku u diskutuan rezultatet e reformës në këtë sektor, si dhe vizioni “Aftësi 2030”, i fokusuar në zhvillimin e aftësive profesionale, rritjen e punësimit dhe forcimin e konkurrueshmërisë së ekonomisë shqiptare.
Gjatë fjalës së tij, kreu i qeverisë u ndal edhe te zhvillimi i turizmit në vend, duke trajtuar debatet e fundit lidhur me praninë e punonjësve të huaj në tregun shqiptar të punës, veçanërisht në sektorin e turizmit dhe hotelerisë.
Rama vlerësoi se pavarësisht problematikave që kanë shoqëruar zhvillimin urbanistik dhe turistik ndër vite, sektori ka njohur përmirësime të vazhdueshme në cilësi, standarde dhe investime. Sipas Ramës rritja e cilësisë së ofertës turistike ka sjellë edhe rritje të kostove, por njëkohësisht edhe të vlerës së tregut dhe të ardhurave që gjeneron industria.
Duke u ndalur te diskutimet mbi punësimin e shtetasve të huaj, kryeministri deklaroi se sfida kryesore e industrisë së turizmit nuk lidhet me nivelin e pagave, por me mungesën e fuqisë punëtore të kualifikuar. Kreu i qeverisë kundërshtoi pretendimet se punonjësit e huaj punësohen për paga të ulëta, duke theksuar se në strukturat turistike ku janë bërë investime serioze, pagat janë konkurruese me ato të vendeve të rajonit dhe më gjerë.
“Nuk gjendet një vend në bregdetin shqiptar ku paga të jetë më e ulët se në Greqi, paga të jetë më e ulët se në Kroaci, nuk ka. Cili është problemi? Problemi është që ata të cilët nxisin racizëm ndaj punonjësve të huaj dhe kujtojnë se punonjësit e huaj vijnë nga Filipinet këtu si skllevër. Ata nuk duan të punojnë dhe të marrin një pagë si në Greqi dhe në Kroaci. Ose nuk janë fare në atë fushë, në nevojë për një punë, përkundrazi punojnë në Instagram dhe japin intervista se si jeta e tyre modeste kushton 20 mijë euro në muaj”, tha Rama.
Pjesë nga fjala e Edi Ramës:
Dëmet mjedisore kanë ardhur gjithmonë në radhë të parë nga faza e zhvillimit, të cilat kanë qenë të bazuara jo thjesht te kapitali vendas, por dhe të lidhura me një horizont të mbyllur lidhur me shumë nga temat komplekse të fushës dhe patjetër kanë qenë të kryqëzuara nga kostoja, nga kostoja e ndërtimit dhe nga çmimi. Po të shikojmë bregdetin shqiptar sot, bregdeti shqiptar ka filluar të zhvillohet në Golem. Sot është e paimagjinueshme që dikush, cilido sipërmarrës vendas, të shfaqet në dyert e autoriteteve dhe të propozojë atë lloj zhvillimi, sepse ai është një zhvillim tërësisht i papranueshëm, por i lidhur me një kohë kur mundësitë ishin shumë të kufizuara, kur kapitali ishte shumë modest, kur dijet ishin shumë të kufizuara dhe mbi të gjitha aftësia blerëse ishte shumë e dyzuar.
Dhe pavarësisht të gjitha problematikave dhe të metave që ka pasur zhvillimi i ndërtimit në fushën e turizmit, gjërat kanë ardhur duke u përmirësuar, zhvillimet kanë ardhur duke u bërë më cilësore, kostoja ka ardhur duke u rritur, por dhe çmimi ka ardhur duke u rritur.
Vijmë te Pakistani dhe Bangladeshi, punonjësit. Sot unë këtë e them me përgjegjësi të plotë dhe sfidoj këdo që thotë të kundërtën. Sot problemi kryesor i industrisë së turizmit nuk është sa të paguajnë dhe nuk ka në turizëm sot, aty ku janë bërë investime dhe janë hotelet, destinacionet e pushimeve, pyetja nuk është sa të paguajnë, pyetja është ku t’i gjejnë punonjësit përkatës të të gjitha niveleve që kanë zanatin për të bërë atë punë si duhet. Dhe nëse dikush më gjen një vend në bregdetin shqiptar, flas gjithmonë për investimet që janë bërë, për hoteleritë ku paguhet më pak se në Greqi, atëherë unë do të detyrohem të rishikoj këtë opinion.
Nuk gjendet një vend në bregdetin shqiptar ku paga të jetë më e ulët se në Greqi, paga të jetë më e ulët se në Kroaci, nuk ka. Cili është problemi? Problemi është që ata të cilët nxisin racizëm ndaj punonjësve të huaj dhe kujtojnë se punonjësit e huaj vijnë nga Filipinet këtu si skllevër. Ata nuk duan të punojnë dhe të marrin një pagë si në Greqi dhe në Kroaci. Ose nuk janë fare në atë fushë, në nevojë për një punë, përkundrazi punojnë në Instagram dhe japin intervista se si jeta e tyre modeste kushton 20 mijë euro në muaj.
Çështja është shumë e thjeshtë, sa më e lartë të jetë cilësia e sistemit të turizmit, aq më të larta do të jenë pagat. Sa më e ulët të jetë cilësia e sistemit, aq më të ulëta do të jenë pagat. Sa më i lartë të jetë konsumi i atyre që vijnë për të shpenzuar në atë sistem, aq më të larta do të jenë të ardhurat e sistemit dhe, për rrjedhojë, edhe të shtetit. Dhe Zvicra, që është një vend turistik, po ashtu është një vend shumë i shtrenjtë, por ka paga shumë të larta. Ka paga shumë të larta për arsyen e thjeshtë sepse ka mundësinë të jetë e shtrenjtë, sepse ka cilësi shumë të lartë.
Sondazh
Lexo gjithashtu
