Një lajm i trishtë ka ardhur nga Vatikani! Papa Françesku ka ndërruar jetë mëngjesin e kësaj të hëne në moshën 88-vjeçare.
Lajmin për ndarjen e tij nga jeta është konfirmuar nga Selia e Shenjtë në Vatikan, duke futur kështu në zi dhe trishtim të thellë miliona besimtarë, jo vetëm në Itali, por në të gjithë botën.
Ai mbylli sytë përgjithmonë të hënën e Pashkëve në “Casa Santa Marta” në Romë, aty ku ishte transferuar pas shtrimit në spitalin Gemelli si pasojë e problemeve me mushkërinë.
“Të dashur vëllezër dhe motra, me dhimbje të thellë duhet të njoftoj vdekjen e Atit tonë të Shenjtë Papa Françesku. Në orën 7:35 të mëngjesit të sotëm, Peshkopi i Romës, Françesku, është kthyer në shtëpinë e Atit. E gjithë jeta e tij iu kushtua shërbimit të Zotit dhe Kishës së Tij.
Ai na mësoi të jetojmë vlerat e Ungjillit me besnikëri, guxim dhe dashuri universale, në mënyrë të veçantë në shërbim të më të varfërve dhe të përjashtuarve. Me një mirënjohje të pamasë për shembullin e tij si një dishepull i vërtetë i Zotit Jezus, ia besojmë shpirtin e Papës Françesku dashurisë së pafund dhe mëshirës së Zotit të vetmit dhe të Trinisë së Shenjtë", njoftoi Kardinali Farrell.
Papa Françesku është përshkruar gjithmonë si bariu i thjeshtë, i cili erdhi nga fundi i botës, nga rrugët e Buenos Airesit, për të udhëhequr Kishën Katolike me përulësi, dashuri dhe guxim. Ai asnjëherë nuk kërkoi fronin, por zemrat e besimtarëve dhe besimin e tyre.
Ditën e djeshme, të dielën e Pashkëve, ai kërkoi të merrte pjesë në kremtimet e meshës ku dhe përcolli mesazhe dhe thirrje të forta. Ai kërkoi armëpushimin në Gaza, paqen në Ukrainë dhe në rajonet afrikane dhe u bëri thirrje të gjitha shteteve që të shtrijnë dorën për popullsinë e Mianmarit të cilët u goditën nga tërmetet shkatërruese.
Gjithashtu Papa Françesku bëri thirrje për respektimin e lirisë fetare dhe kërkon lirimin e të burgosurve të luftës dhe të burgosurve politikë, gjatë Jubileut. I lindur me emrin Jorge Mario Bergoglio më 17 dhjetor 1936 në Buenos Aires të Argjentinës, ai ishte Papa i parë nga Amerika Latine.
Gjatë viteve të udhëheqjes së tij, Papa Françesku do të kujtohet si një zë i fuqishëm i thjeshtësisë, mëshirës dhe drejtësisë. Ai u përpoq të sillte Kishën më pranë njerëzve të zakonshëm, duke e bërë atë më të hapur dhe më përfshirëse për të gjithë.
Ndërsa kambanat e Vatikanit bien sot me pikëllim, bota përkulet me respekt për një njeri që la një gjurmë të pashlyeshme. Trashëgimia e tij do të jetojë gjatë, në zemrat e atyre që e deshën, e ndoqën dhe u frymëzuan nga fjalët dhe veprat e tij.
Nga Buenos Aires në Vatikan:
Bergoglio, pasi u diplomua si teknik kimik, zgjodhi rrugën e priftërisë dhe në vitin 1958, hyri në Shoqërinë e Jezusit. Në vitin 1963 ai u diplomua për filozofi në kolegjin San Giuseppe në San Miguel, Argjentinë, dhe ndërsa jepte letërsi dhe psikologji në një kolegj në Buenos Aires ai u diplomua edhe për Teologji.
Ai u shugurua si prift në vitin 1969 dhe më pas u emërua peshkop i Aucas nga Gjon Pali II. Në vitin 1998 u bë Kryepeshkop i Buenos Aires dhe më 21 shkurt 2001 Gjon Pali II e bëri atë kardinal. Pas dorëheqjes së Papa Benediktit XVI në mars të vitit 2013, Jorge Mario Bergoglio mori pjesë në konklavën në të cilën, pas pesë votimesh, u zgjodh Pap Suprem.
Pikat e forta të pushtetit moral të Papës:
Bergoglio ishte jezuiti i parë që u bë Papë dhe Papa i parë nga kontinenti amerikan. Zgjedhja e emrit Françesku, si Pap, lidhet me shpresën për të ndjekur gjurmët e shenjtorit të Asizit. Gjatë pontifikatës së tij, pati shumë pika kthese. I pyetur nga gazetarët mbi temën e homoseksualitetit gjatë fluturimit nga Brazili në korrik 2013, Papa Françesku u përgjigj: "Nëse një person është homoseksual dhe kërkon Zotin dhe ka vullnet të mirë, kush jam unë për ta gjykuar?"
Më pas, në Sinodet e 2015 dhe 2016, ai ripranoi personat e divorcuar dhe të rimartuar dhe bëri thirrje për vëmendje më të madhe ndaj bashkimeve civile, çifteve de facto dhe homoseksualëve, për të cilët kërkoi "respekt dhe pranim". Për më tepër, më 11 prill 2015, Papa Françesku shpalli zyrtarisht një Jubile të jashtëzakonshëm kushtuar mëshirës, i cili do të zgjaste nga 8 dhjetori 2015 deri më 20 nëntor 2016. Gjithashtu në vitin 2016.
Gjatë viteve të tij si Papë, Bergoglio kreu gjithashtu reforma të shumta, duke përfshirë ato të Curia, IOR dhe kodin penal të Vatikanit. Një tjetër pikë kthese ishte sigurisht lehtësimi progresiv i marrëdhënieve me Kinën. Pati gjithashtu shumë apele për të luftuar ndryshimet klimatike.
Ndërkohë, më pas në vitin 2023, pas gati katër vitesh eksperimentimi, pasi u konsultuan me peshkopatat dhe dikasteritë e Kurisë Romake,Papa Françesku shpalli procedurat për të parandaluar dhe luftuar fenomenin e abuzimit seksual brenda Kishës Katolike. Më 14 qershor 2024, Bergoglio ishte protagonisti i G7 në Pulia, i pari për një Papë.
-
Shuhet Papa Françesku!
21 Prill, 10:45
Sondazh
Lexo gjithashtu
