Papa Leo XIV mbërriti këtë të shtunë në mëngjes në Aeroportin Adolfo Suarez Madrid-Barajas, duke nisur vizitën e tij apostolike në Spanjë, e cila do të zgjasë deri më 12 qershor.
Gjatë fluturimit drejt Madridit, Ati i Shenjtë u ndal te disa nga sfidat më të mëdha të aktualitetit ndërkombëtar, duke folur për luftën në Ukrainë, tensionet në Lindjen e Mesme dhe plagën e abuzimeve seksuale brenda Kishës Katolike.
Në një bisedë me gazetarët në bordin e avionit papnor, Papa shprehu shqetësimin për vazhdimin e konfliktit në Ukrainë, i cili ka hyrë në vitin e pestë të tij.
“Mesazhi është tashmë në enciklikë. Ne duhet gjithashtu të promovojmë negociatat. Të paktën po bëheshin disa përpjekje, por ne duhet të shtyjmë vërtet për t’i dhënë fund dhunës dhe luftës”, deklaroi udhëheqësi i Kishës Katolike, duke iu referuar përpjekjeve të mëparshme për dialog mes presidentit ukrainas Volodymyr Zelensky dhe atij rus Vladimir Putin.
I pyetur nëse përshkallëzimi i situatës me Iranin mund të konsiderohet një “luftë e drejtë”, Papa Leo XIV hodhi poshtë këtë koncept, duke iu referuar dokumentit të tij më të fundit magjistral, “Magnifica Humanitas”.
“Unë besoj se është thënë shumë qartë: atje nuk ka luftë të drejtë. Problemi është se teoria e luftës së drejtë vjen nga shekujt e kaluar, kur njerëzit nuk mund t’i imagjinonin armët dhe kapacitetin për shkatërrim që ka njeriu sot”, argumentoi ai.
Sondazh
Lexo gjithashtu
