Kryeministri Edi Rama ka marrë përsipër të kujdeset për homazhet që do të zhvillohen në nder të shkrimtarit të madh shqiptar, gjeniut të letrave Ismail Kadare. Ai u nda nga jeta mëngjesin e kësaj të hëne, pas një arresti kardiak në shtëpinë e tij në Tiranë.
Rama dhe stafi i tij do të kujdesen deri në detaje për ceremoninë e homazheve, pasi pritet që të jenë qindra personalitete të artit, politikës dhe kulturës që do të marrin pjesë në lamtumirën e fundit për shkrimtarin përbotshëm.
"Homazhet janë marrë përsipër nga Kryeministri", është shprehur botuesi Bujar Hudhri.
Shtëpia botuese "Onufri" ishte botuese e veprave të Ismail Kadare. Drejtuesi Bujar Hudhri në një intervistë për Top Channel, tregoi se si ishte gjendja e tij shëndetësore para se të ndërronte jetë dhe se a kishte ndonjë merak.
Hudhri: Nuk e kisha menduar një lajm të tillë, kam menduar që një shkrimtar i madh si Kadare nuk i përket kësaj bote, por një planeti paralel të letërsisë. Më trishton që Kadare më thoshte që shtëpia botuese është shtëpia e dytë e shkrimtarit dhe më shumë se kurrë i ndjej këto fjalë. Unë e kam ndjerë gjithmonë këtë raport timin, unë jam botuesi i tij.
A iku me ndonjë merak Kadare, çfarë bisedonit?
Hudhri: Mendoj që ka ikur i lumtur, edhe pse nuk i shkon letërsisë së tij kjo fjalë. Ishte i lumtur që vjet Onufri nxori veprën e tij të plotë, që koicidonte 70 vjet me letërsinë e tij, në ato 7 vëllime herë 1000 faqe, jam i lumtur që kjo vepër madhështore u promovua në panairin e librit në Prishtinë. Ishte një atmosferë që Kadare u ndje shumë mirë.
Si ka qenë gjendja e tij shëndetësore?
Hudhri: Ka qenë i dobët fizikisht, kishte dëshirë të dilte, dilte me vështirësi. Dilte te kafja e tij e preferuar, me miqtë e tij. Ishte në Tiranë dhe kanë qenë orët e tij më të bukura në kafene duke biseduar dhe takuar njerëz.
A jeni kontaktuar nga personalitete të huaja?
Hurdhi: Kadare është pjesë e thesarit botëror, mori çmimet më të larta, vlerësimi më i madh është që është në panteonen e letërsisë botërore. Një shkrimtar nuk ka lindje dhe vdekje, nuk ka një kufi kohor.
Kush do të kujdeset për homazhet?
Hurdhi: Homazhet janë marrë përsipër nga Kryeministri.
-
Shuhet i madhi Ismail Kadare!
1 Korrik, 10:34
Sondazh
Lexo gjithashtu
