Qeveria amerikane ka kundërshtuar një ankand të planifikuar nga kompania RMS Titanic Inc., e cila zotëron të drejtat ekskluzive për eksplorimin e rrënojave të Titanikut. Kompania synon të shesë mbi 100 objekte të nxjerra nga anija e fundosur në vitin 1912, përfshirë sende personale të pasagjerëve, para, pajisje kuzhine dhe dekorime.
Ndër artikujt që mund të dalin në ankand janë një figurë engjëlli prej bronzi, një gjerdan ari dhe një varëse në formë zemre. Krahas ankandit, kompania planifikon edhe një ekspozitë ndërkombëtare në katër qytete, por vendet nuk janë shpallur ende.
Administrata Kombëtare Oqeanike dhe Atmosferike (NOAA) ka kundërshtuar shitjen, duke argumentuar se ajo bie ndesh me marrëveshjet gjyqësore ekzistuese, sipas të cilave objektet duhet të ruhen si koleksion unik dhe të ekspozohen për publikun. Qeveria amerikane ka paraqitur padi, duke deklaruar se kompania nuk ka kërkuar miratimin e gjykatës.
RMS Titanic Inc. ka mbrojtur planin e saj, duke thënë se shitja nuk shkel vendimet e mëparshme. Që nga viti 1987, mijëra objekte janë nxjerrë nga rrënojat, dhe deri më tani kompania ka financuar aktivitetet kryesisht përmes ekspozitave. Përpjekjet për shitje kanë hasur kundërshtime nga gjykatat, organizatat e trashëgimisë kulturore dhe familjet e viktimave.
Interesi i koleksionistëve për artefaktet e Titanikut mbetet i lartë kujtojmë një orë xhepi prej ari të biznesmenit Isidore Strauss, e shitur për mbi 2 milionë dollarë, një violinë e shitur për 1.45 milionë dollarë dhe një jelek shpëtimi i shitur për 906,000 dollarë.
Titaniku u fundos më 15 prill 1912 pas përplasjes me një ajsberg, duke marrë me vete jetën e mbi 1,500 njerëzve.
Sondazh
Lexo gjithashtu
