Prej ditësh protestat në Shqipëri janë në qendër të vëmendjes jo vetëm të mediave vendase por dhe të atyre huaja, ndaj kryeministri Edi Rama është prononcuar së fundmi për ItalPress duke komentuar situatën aktuale në vend.
“Për vite me radhë jam akuzuar për të gjitha llojet e gjërave. Nuk e di nëse ka mbetur ende diçka që nuk më është atribuar mua, por kjo protestë më shkakton dhimbje të thellë. Sepse në atë pikë nuk bëhet më vetëm për mua, por për Shqipërinë” është shprehur kryeministri për ItalPress, në lidhje me tubimet e njerëzve të cilat sot hyjnë në ditën e tyre të 27-të.
Më tej kryeministri i Shqipëria ka theksuar në fjalën e tij se kjo histori mbetet narrativë e pabazuar, ndërsa shton se njerëzit që pretendojnë se është dëmtuar mjedisi, duhet të sjellin prova për këtë. Në lidhje me dëmet e shkaktuara në mjedis nga përpjekja për të mundësuar investime amerikane në Shqipëri, Rama tha se deri më tani nuk është dorëzuar asnjë provë.
“Si mund të përgjigjet dikush? Kemi arritur në një pikë ku një parim themelor duket se është përmbysur : duhet të jenë ata që ngrenë akuza ata që ofrojnë prova, jo të akuzuarit ata që duhet të vërtetojnë vazhdimisht pafajësinë e tyre. Ky i ashtuquajtur Revolucion Flamingo fillimisht dukej pothuajse si komplot filmi. Sot më duket se protesta ka marrë drejtime të tjera dhe është zhvendosur në çështje të tjera.
Nëse më akuzojnë se kam dorëzuar këto toka ose se kam dëmtuar një pjesë të bukur të vijës bregdetare të Shqipërisë, atëherë duhet të sjellin provat. Megjithatë, deri më tani nuk është paraqitur asnjë provë. Askush, deri më tani, nuk ka provuar asgjë. Nuk ka prova sepse procesi është ende në vazhdim” tha më tej Rama, duke shtuar se marrëveshja nuk është nënshkruar ende sepse negociatat nuk kanë përfunduar.
Po ashtu, Rama tha se i kuptonte arsyet e atyre që kishin dalë në rrugë, por sfidoi mënyrën se si çështja u vu në qendër të vëmendjes akoma pa bërë një diskutim mes përfaqësuesve të investimeve dhe palës tjetër që kundërshton publikisht projektin.
Duke u ndalur te përdorimi i figurës së flamingos, Rama u shpreh se tashmë është kthyer në një simbol të dobishëm që dëshiron ta çojë çështjen në skenën ndërkombëtare.
“E kam thënë publikisht: nëse do të kisha qenë midis tyre dhe do të kisha dëgjuar gjithçka që thuhej, ndoshta do të kisha ndjerë të njëjtën pakënaqësi dhe të njëjtën indinjatë. Por nëse do ta kisha dëgjuar më pas palën tjetër - në këtë rast qeverinë - duke thënë: ‘Ejani, do t'ju tregoj se nuk ka asgjë nga ato që ju janë thënë, nuk ka prova’, do të isha ndjerë i qetësuar dhe do të isha kthyer në shtëpi.
Fatkeqësisht, sot çështja ka shkuar përtej kësaj dhe njerëzit as nuk flasin më për flamingot. Flamingot janë bërë një simbol i dobishëm për ata që duan ta çojnë këtë çështje në skenën ndërkombëtare. Nëse në nivel lokal është një çështje që përfshin grupe të ndryshme në shoqëri, përfshirë opozitën, në nivel ndërkombëtar bëhet një betejë kundër Donald Trump”, përfundoi kryemninistri i Shqipërisë.
Sondazh
Lexo gjithashtu
