Skema Kombëtare e Mbështetjes në Bujqësi 2026 ka shënuar një interes të lartë nga fermerët në të gjithë vendin, duke regjistruar gjithsej 42,728 aplikime. Ky interes konfirmon rolin e rëndësishëm të skemës si një instrument financiar që mbështet zhvillimin e bujqësisë, rritjen e investimeve dhe përmirësimin e konkurrueshmërisë së fermave.
Qarku i Fierit kryeson me numrin më të lartë të fermerëve aplikues, i ndjekur nga Korça, Elbasani dhe Vlora, qarqe që vijojnë të mbajnë peshën kryesore të prodhimit bujqësor në vend.
Këtë vit, Skema Kombëtare u organizua në 12 masa mbështetëse, të ndara në 9 masa direkte dhe 3 masa investimesh, duke ofruar mundësi financimi për sektorë të ndryshëm.
Masat direkte përfshijnë:
1. Tufën bazë të gjedhit;
2. Tufën bazë të të imtave;
3. Bletarinë;
4. Dosa dhe paradosat;
5. Kontrollin biologjik në serra;
6. Fermat organike;
7. Certifikimin Global G.A.P.;
8. Mbështetjen për sipërfaqet e mbjella;
9. Ripopullimin në ujërat e brendshme.
Këto masa synojnë të mbështesin fermerët në uljen e kostove të prodhimit, rritjen e cilësisë së produkteve, përmirësimin e standardeve të prodhimit dhe nxitjen e praktikave të qëndrueshme bujqësore.
Në të njëjtën kohë, 3 masat e investimeve përfshijnë:
1. Mbështetjen e fermerëve të rinj deri në 40 vjeç;
2. Ndërtimin dhe rikonstruksionin e staneve;
3. Mekanizimin e bujqësisë.
Përmes këtyre investimeve synohet modernizimi i fermave, rritja e kapaciteteve prodhuese, përmirësimi i kushteve të punës dhe rritja e efikasitetit në aktivitetin bujqësor.
Vlerësimi i aplikimeve ka nisur.
Pas përfundimit të periudhës së aplikimeve, procesi i vlerësimit administrativ vijon në përputhje me kriteret dhe rregullat e përcaktuara në udhëzimin përkatës, sipas afateve të parashikuara.
Sondazh
Lexo gjithashtu
