Nafta e papërpunuar Brent ka rënë në 72 dollarë për fuçi, duke u rikthyer për herë të parë në nivelet para fillimit të ofensivës ushtarake nga SHBA dhe Izraeli kundër Iranit, ndërsa negociatat midis Uashingtonit dhe Teheranit për të frenuar luftën përparojnë.
Nafta “Brent” e njohur dhe si “Brent Blend”, “London Brent” dhe “Brent Petroleum” është standardi kryesor i çmimeve globale për naftën bruto në Europë dhe sot bursat janë hapur me çmimin 72.82 dollarë.
Kurse fuçia e naftës së papërpunuar West Texas Intermediate (WTI), një pikë referimi në Shtetet e Bashkuara, regjistroi një rënie deri në 1.8%, duke arritur në 69.07 dollarë, ende mbi nivelin para fillimit të konfliktit.
Korrigjimi i çmimeve të naftës, i cili në rastin e Brent arriti një maksimum prej 126.10 dollarësh më 30 prill, është intensifikuar që nga fundi i majit, duke përkuar me përparimin e negociatave midis Uashingtonit dhe Teheranit në përpjekje për t'i dhënë fund konfliktit.
Si rezultat i këtyre kontakteve, delegacionet nënshkruan së fundmi një memorandum që vendos një armëpushim 60-ditor, gjatë të cilit do të kërkohet një marrëveshje përfundimtare që të përfshijë çështjen bërthamore iraniane, rihapjen pa pagesë të Ngushticës së Hormuzit dhe krijimin e një fondi rindërtimi të pajisur me 300 miliardë dollarë (rreth 260 miliardë euro).
Po kështu, Qeveria e Pakistanit njoftoi dje se bisedimet teknike midis Shteteve të Bashkuara dhe Iranit do të rifillojnë javën e ardhshme, pas takimeve të fundit të mbajtura në Zvicër.
Sondazh
Lexo gjithashtu
