Pas deklaratës publike të bërë mesditën e kësaj të mërkure nga deputetja Marjana Koçeku, e cila iu drejtua publikisht grupit Bajri në Shkodër duke pretenduar se ajo dhe familja e saj kanë kërcënuar, ka ardhur reagimi i përfaqësuesit ligjor të familjes Bajri.
Ka qenë avokati Sokol Tahiraj i cili përmes një deklarate zyrtare ka bërë të ditur se akuzat e ngritura publikisht nga Koçeku janë të pabazuara në prova dhe përbëjnë sipas tij një sulm të drejtpërdrejtë ndaj reputacionit dhe dinjitetit të personave që ai përfaqëson.
“Në lidhje me deklaratat e bëra publikisht nga deputetja Marjana Koçeku, të cilat përmendin klientët tanë dhe i referohen atyre me etiketime denigruese e paragjykuese, ndjejmë detyrimin të sqarojmë opinionin publik se këto deklarata janë të pabazuara në prova dhe përbëjnë një sulm të drejtpërdrejtë ndaj dinjitetit, reputacionit dhe të drejtave themelore të personave që ne përfaqësojmë.
Në një shtet të së drejtës, askush nuk mund të shpallet fajtor apo të etiketohet publikisht mbi bazën e deklaratave politike, perceptimeve personale apo insinuatave mediatike. Çdo pretendim për përgjegjësi penale duhet të mbështetet në prova dhe të vlerësohet vetëm nga organet kompetente të drejtësisë, e jo nga deklarata publike me karakter denigrues”, shkruan avokati, teksa thekson më tej se po shqyrtohen të gjitha hapat ligjorë të mundshëm për mbrojtjen e klientëve të tij, përfshirë edhe ndjekjen e procedurave pranë organeve kompetente, në rast se vlerësohet se janë cenuar të drejtat e tyre përmes deklaratave publike.
Në të njëjtën kohë, avokati i bën thirrje deputetes Koçeku që nëse disponon prova për pretendimet e saj, atëhere t’i paraqesë ato pranë institucioneve ligjzbatuese dhe jo t’i trajtojë publikisht në media apo rrjetet sociale.
"Ftojmë zonjën Koçeku që, nëse disponon prova konkrete për çdo pretendim të bërë publikisht, t’i paraqesë ato pranë institucioneve përgjegjëse sipas ligjit dhe jo të zhvillojë gjyqe publike në media apo rrjete sociale", shkruan ai ndër të tjera.
DEKLARATA E PLOTË E AVOKATIT SOKOL TAHIRAJ:
Në lidhje me deklaratat e bëra publikisht nga deputetja Marjana Koçeku, të cilat përmendin klientët tanë dhe i referohen atyre me etiketime denigruese e paragjykuese, ndjejmë detyrimin të sqarojmë opinionin publik se këto deklarata janë të pabazuara në prova dhe përbëjnë një sulm të drejtpërdrejtë ndaj dinjitetit, reputacionit dhe të drejtave themelore të personave që ne përfaqësojmë.
Në një shtet të së drejtës, askush nuk mund të shpallet fajtor apo të etiketohet publikisht mbi bazën e deklaratave politike, perceptimeve personale apo insinuatave mediatike. Çdo pretendim për përgjegjësi penale duhet të mbështetet në prova dhe të vlerësohet vetëm nga organet kompetente të drejtësisë, e jo nga deklarata publike me karakter denigrues.
Deklaratat e deputetes, të cilat përmendin klientët tanë në një kontekst kërcënues dhe stigmatizues, cenojnë parimin e prezumimit të pafajësisë, të garantuar nga Kushtetuta e Republikës së Shqipërisë dhe nga Konventa Evropiane për të Drejtat e Njeriut.
Për më tepër, gjuha e përdorur në reagimin e saj publik nuk kontribuon në debatin demokratik dhe as në informimin e publikut, por krijon një klimë tensioni dhe paragjykimi ndaj personave të përmendur, duke synuar dëmtimin e reputacionit të tyre dhe të familjeve të tyre.
Për këto arsye, po shqyrtojmë me seriozitet të gjitha mjetet ligjore në dispozicion për mbrojtjen e interesave të klientëve tanë, përfshirë kallëzimet pranë organeve kompetente dhe ndjekjen e procedurave ligjore për çdo deklaratë që rezulton e pavërtetë, shpifëse apo cënuese të të drejtave të tyre.
Ftojmë zonjën Koçeku që, nëse disponon prova konkrete për çdo pretendim të bërë publikisht, t’i paraqesë ato pranë institucioneve përgjegjëse sipas ligjit dhe jo të zhvillojë gjyqe publike në media apo rrjete sociale.
Klientët tanë do të vazhdojnë të mbrojnë të drejtat e tyre me mjetet që garanton ligji, ndërsa ne, si përfaqësues ligjorë, do të reagojmë ndaj çdo përpjekjeje për t’i dëmtuar ata përmes deklaratave të pabazuara dhe denigruese.
AVOKAT SOKOL TAHIRAJ
Përfaqësues Ligjor
Sondazh
Lexo gjithashtu
