Prokuroria e Posaçme Kundër Korrupsionit dhe Krimit të Organizuar, në bashkëpunim me Policinë e Shtetit, ka zhvilluar në orët e para të mëngjesit të së premtes një operacion të gjerë kundër një grupi të strukturuar kriminal të dyshuar për trafik ndërkombëtar të lëndëve narkotike dhe pastrim të parave në shuma të konsiderueshme.
Sipas të dhënave paraprake hetimet kanë në fokus një organizatë kriminale që dyshohet se ka vepruar kryesisht në zonën e Kamzës dhe që drejtohej nga vëllezërit Abedin dhe Luçiano Koçeku. Në kuadër të këtij operacioni janë lëshuar 20 masa sigurie, prej të cilave 15 “arrest në burg” dhe 5 “arrest shtëpie”.
Deri tani raportohet se është ekzekutuar masa e sigurisë ndaj Orest Sotës, i cili ka rënë në prangat e policisë, ndërsa disa prej personave të tjerë të përfshirë në dosje ndodhen jashtë vendit dhe janë shpallur në kërkim.
Mes emrave për të cilët SPAK ka lëshuar masa sigurie janë Abedin Koçeku, Luçiano alias Tur Koçeku, Orest Sota, Artur Shehu, Ilir Shtufi, Edmond Jaupi, Orges Birçaj, Baftri Troci, Gëzim Islami dhe Dritan Aga.
Në fokus të hetimeve të SPAK është edhe aktiviteti ekonomik i personave të dyshuar. Luçiano Koçeku rezulton pronar i vetëm i shoqërisë “G.A.V Invest”, kompani e themeluar në vitin 2022 me aktivitet në fushën e ndërtimit, investimeve turistike, hotelerisë, tregtisë dhe zhvillimit të projekteve infrastrukturore.
Po asht ai zotëron 10 për qind të aksioneve në kompaninë “Ballenja Kompani”, e cila ka përfituar koncesionin 35-vjeçar për financimin dhe ndërtimin e hidrocentralit “Ballenjë” në Bulqizë, ku ushtron edhe funksionin e administratorit së bashku me dy persona të tjerë. Ndërkohë që prej vitit 2018 ai rezulton aksioner me 30 për qind në kompaninë “SGD Energji”, që operon në sektorin e prodhimit dhe tregtimit të energjisë elektrike.
Në kuadër të operacionit janë ndërmarrë masa edhe ndaj aktiviteteve të dyshuara si të lidhura me pastrimin e parave. Me urdhër të SPAK është vendosur sekuestro ndaj biznesit të makinave me qira “Top Seven”, pranë ish-Parkut të Autobusëve në Tiranë. Edhe pse biznesi figuron në emër të Erinda Lutajt, hetuesit dyshojnë se pronari faktik është biznesmeni Orges Birçaj, emër i përfshirë gjithashtu në dosjen e operacionit.
Hetimet vijojnë, ndërsa SPAK dhe Policia e Shtetit po punojnë për lokalizimin dhe ekzekutimin e masave të sigurisë ndaj personave të tjerë të shpallur në kërkim si dhe për dokumentimin e plotë të aktivitetit të dyshuar kriminal që përfshin trafik droge, pastrim parash dhe investime në sektorë të ndryshëm të ekonomisë.
DISA PREJ EMRAVE PËR TË CILËT JANË LËSHUAR MASË SIGURIE:
Abedin Koçeku
Luçiano allias Tur Koçeku
Orest Sota
Artur Shehu
Ilir Shtufi
Edmond Jaupi
Orges Birçaj
Baftri Troci
Gëzim Islami
Dritan Aga
Sondazh
Lexo gjithashtu
