Një kompani bioteknologjie në Boston, ka nisur provat klinike të para tek njerëzit me një terapi gjenetike të quajtur ER-100 (AAV2-OSK). Qëllimi i saj është të rikthejë qelizat e dëmtuara në një gjendje më të re dhe të trajtojë sëmundje serioze të syrit si glaukoma dhe neuropatia optike ishemike.
Terapia përdor tre proteina të njohura si Oct4, Sox2 dhe Klf4, të cilat veprojnë si një “buton rivendosjeje” për qelizat. ADN-ja e njeriut mbetet e qëndrueshme gjatë gjithë jetës, por epigjenoma kodi që kontrollon cilat gjene ndizen ose fiken ndryshon me kalimin e kohës për shkak të plakjes, sëmundjeve apo stilit të jetës.
Këto ndryshime mund të çojnë në pasoja të rënda, përfshirë kancerin dhe çrregullimet neurologjike. Terapia ER-100 synon të rikthejë këtë informacion të humbur dhe të përmirësojë funksionin e qelizave.
David Sinclair, profesor i gjenetikës në Harvard dhe bashkëthemelues i Life Biosciences, tha:
“Hulumtimi ynë ka sugjeruar që plakja është kryesisht e nxitur nga humbja e informacionit epigjenetik, jo nga dëmtimi i pakthyeshëm. Ky studim klinik përfaqëson mundësinë e parë për të testuar nëse rivendosja e këtij informacioni mund të përmirësojë rrjedhën e sëmundjeve njerëzore.”
Ky është një hap i rëndësishëm në mjekësinë moderne, edhe pse terapia është ende në fazë prove. Nëse provat klinike rezultojnë të suksesshme, kjo mund të hapë rrugën për trajtime të tjera kundër plakjes dhe sëmundjeve të lidhura me moshën.
Sondazh
Lexo gjithashtu
