Paraditen e kësaj të diele, kandidatja për presidente Vjosa Osmani dhe kryeministri në detyrë Albin Kurti iu drejtuan qendrave të votimit për të ushtruar të drejtën e tyre kushtetuese në zgjedhjet parlamentare që po mbahen në Kosovë.
E shoqëruar nga bashkëshorti i saj, Osmani votoi në shkollën fillore “Shkëndija” në Hajvali të Prishtinës, duke iu bashkuar mijëra qytetarëve që po marrin pjesë në procesin zgjedhor për zgjedhjen e përbërjes së re të Kuvendit të Kosovës. Pas votimit, ajo falënderoi qytetarët për angazhimin e tyre në proceset demokratike dhe vlerësoi pjesëmarrjen në zgjedhje si një kontribut të rëndësishëm për të ardhmen e vendit.
“Jemi në heshtje zgjedhore, por normalisht jam shumë e lumtur me mënyrën se si qytetarët e Kosovës e marrin si detyrim kombëtar mundësinë për të kontribuar në çdo proces zgjedhor, sepse kjo është shumë me rëndësi. Pa ta s’ka demokraci dhe jam tepër mirënjohëse për gjithçka që bëjnë për këtë vend”, deklaroi Osmani para mediave.
Ndërkohë, kryeministri në detyrë Albin Kurti votoi në Fakultetin Juridik në Prishtinë nga ku u bëri thirrje qytetarëve të shfrytëzojnë të drejtën e votës. Ai e cilësoi 7 qershorin si një ditë të rëndësishme për demokracinë e vendit dhe theksoi se pjesëmarrja qytetare mbetet elementi kyç për legjitimitetin e institucioneve.
“Sot është një ditë e bukur dhe e rëndësishme. U bëj thirrje të gjithë qytetarëve që të dalin në votime, sepse sot vendosin ata që votojnë”, deklaroi Kurti.
Procesi zgjedhor po zhvillohet nën monitorimin e institucioneve vendore dhe ndërkombëtare, ndërsa në qendrat e votimit gjatë orëve të para është raportuar për një interesim të lartë të qytetarëve.
Kosova po mban sot zgjedhjet e treta parlamentare brenda vetëm 16 muajsh. Sipas Komisionit Qendror të Zgjedhjeve, të drejtën e votës e kanë mbi 2 milionë qytetarë, ndërsa procesi organizohet në 949 qendra votimi me 2.550 vendvotime në të gjithë territorin e vendit.
Në garë marrin pjesë 22 parti politike dhe tre koalicione parazgjedhore, ndërsa vëmendje të veçantë ka tërhequr rikthimi në garën elektorale i ish-presidentes Vjosa Osmani, e cila kandidon në listën e Lidhjes Demokratike të Kosovës. Një ditë më parë ka përfunduar edhe votimi i diasporës në përfaqësitë diplomatike të Kosovës, ku pjesëmarrja ka qenë mbi 80 për qind.
Zgjedhjet po ndiqen me interes edhe nga Bashkimi Evropian, i cili ka theksuar rëndësinë e krijimit të institucioneve të qëndrueshme dhe vazhdimit të reformave në kuadër të procesit të integrimit evropian të Kosovës.
Sondazh
Lexo gjithashtu
