Qytetarët e Kosovës po marrin pjesë sot në zgjedhjet e reja të parakohshme parlamentare, të tretat brenda rreth 18 muajve, në një proces që vjen pas dështimeve të njëpasnjëshme për formimin e një shumice të qëndrueshme parlamentare që do ta nxirrte vendin nga kriza politike.
Qendrat e votimit u hapën në orën 07:00 dhe pritet të mbyllen në orën 19:00, sipas Komisionit Qendror të Zgjedhjeve.
Kryetari i KQZ-së, Kreshnik Radoniqi, deklaroi në një konferencë për media se procesi zgjedhor po zhvillohet në mënyrë të rregullt dhe pa asnjë incident në të gjitha 38 komunat e vendit.
“Sipas të dhënave të raportuara nga komisionet komunale të zgjedhjeve, votimi deri në këtë kohë është duke u zhvilluar në kushte të rregullta dhe pa probleme që do ta cenonin mbarëvajtjen e procesit zgjedhor”, tha Radoniqi.
Sipas të dhënave zyrtare të KQZ-së, deri në orën 13:00 kanë votuar 15.77 për qind e rreth 2 milionë qytetarëve me të drejtë vote. Kjo shifër paraqet një dalje më të ulët krahasuar me zgjedhjet e kaluara të dhjetorit, ku pjesëmarrja kishte tejkaluar 18 për qind në të njëjtën periudhë.
Këto zgjedhje janë të tretat brenda më pak se një viti e gjysmë, pas zgjedhjeve të rregullta të 9 shkurtit 2025 dhe një tjetër palë zgjedhjesh të parakohshme më 28 dhjetor.
Zgjedhjet e para nuk arritën të prodhonin një qeveri funksionale, ndërsa ato të dytat, ndonëse i dhanë Lëvizjes Vetëvendosje mbi 51 për qind të votave, shumicën më të madhe të arritur ndonjëherë në Kosovë nuk rezultuan me marrëveshje politike për formimin e institucioneve, për shkak të bllokadave në procesin e zgjedhjes së presidentit, sipas një vendimi të Gjykatës Kushtetuese.
Kjo situatë çoi në shpërndarjen automatike të Kuvendit në mesnatën e 28 prillit, vetëm dy muaj e gjysmë pas konstituimit të tij. Dy ditë më vonë, ushtruesja e detyrës së presidentit, Albulena Haxhiu, shpalli zgjedhjet e reja parlamentare.
Sondazh
Lexo gjithashtu
