Një aksident me pasojë vdekjen ka ndodhur mbrëmjen e djeshme në autostradën Lushnje-Tiranë, pranë urës mbi lumin Shkumbin.
Sipas informacioneve paraprake, viktima është shtetasi Taulant Veliu, 37 vjeç, i cili po udhëtonte me biçikletë në krahun e kundërt të lëvizjes.
Burimet nga vendngjarja bëjnë me dije se 37-vjeçari fillimisht është përplasur me pasqyrën e një automjeti që po lëvizte në autostradë. Si pasojë e goditjes, ai është spostuar në mes të rrugës, ku është përplasur nga një automjet tjetër tip “Benz”.
Për shkak të përplasjes së fortë, drejtuesi i biçikletës është tërhequr zvarrë për disa metra, duke humbur jetën në vendngjarje.
Policia e Lushnjës ka shoqëruar menjëherë dy drejtuesit e automjeteve të përfshira në aksident.
