Corriere della Sera i ka kushtuar një artikull të plotë jetës dhe familjes së udhëheqësit të Koresë së Veriut, Kim Jong-un, duke sjellë në vëmendje figurën e nënës së tij, e cila është mbajtur e fshehur nga propaganda zyrtare.
Historia e Ko Yong Hui, e lindur në Japoni në vitin 1952, është një sagë e mbushur me emigrim, dashuri dhe sekrete të rënda për dinastinë që sundon prej dekadash.
Ko Yong Hui ishte vajza e një emigranti nga Jeju, i cili u vendos në Osaka gjatë viteve ’30. Pas kthimeve të shumta mes Koresë dhe Japonisë, familja e saj u përfshi në programin e kthimit të koreanëve nga Japonia në vitin 1962. Me talentin e saj për vallëzim, Yong Hui u pranua në trupën artistike Mansudae, ku ra në sy të Kim Jong-ilit.
Nga kjo lidhje, edhe pse jo martesë zyrtare, lindën tre fëmijë, Kim Jong-chol, Kim Jong-un dhe Kim Yo-jong.
Megjithatë, figura e saj u zhduk nga kujtesa publike. Arsyeja lidhet me mitologjinë e “vijës së gjakut të malit Paektu”, që regjimi e përdor për të legjitimuar pushtetin.
Të pranohej se udhëheqësi aktual është djali i një gruaje të lindur në Japoni do të ishte një goditje e rëndë për prestigjin e dinastisë. Marrëdhëniet e tensionuara mes Phenianit dhe Tokios e bëjnë këtë fakt edhe më të ndjeshëm.
Ko Yong Hui vdiq nga kanceri në vitin 2004, në një klinikë në Paris, por trashëgimia e saj mbetet e fshehur. Sipas autorit japonez Gomi Yoji, në Japoni jetojnë ende dhjetëra të afërm biologjikë të Kim Jong-unit. Ndërkohë, propaganda e Koresë së Veriut vazhdon ta paraqesë udhëheqësin si pasardhës të malit Paektu, duke fshirë çdo gjurmë të origjinës së nënës së tij.
Sondazh
Lexo gjithashtu
