Një operacion i gjerë kundër krimit të organizuar, është zhvilluar këtë të mërkurë në Kosovë. Policia kosovare bën me dije se arrestuan nëntë persona dhe u bastisën 21 lokacione ndërsa u gjetën edhe 15 mijë euro.
Po ashtu autoritetet sekuestruan automjete, autobotë për derivate, armë, municion dhe prova të tjera materiale.
Nëntë personat e arrestuar akuzohen për veprat penale: për veprat penale: shpëlarje parash, kontrabandim mallrash në bashkëkryerje, pjesëmarrje ose organizim të grupit kriminal të organizuar, dokumente të rreme lidhur me tatimin dhe shmangie nga tatimi.
Bëhet fjalë për: Gazmend Quni, Skender Kelmendi, Faruk Mazrek, Naser Morina, Korab Visoka, Dashnim Miftari , Muhamet Mazrek, Fatmir Visoka, Adem Morina, Feriz Mazrek, Nysret Bajraktari.
Ndërsa detaje të reja pritet që të dalin në orët në vijim në lidhje me këtë ngjarje.
Njoftimi i policisë së Kosovës:
Komunikatë e përbashkët e Prokurorisë Speciale, Policisë së Kosovës, Doganës dhe ATK-së
OPERACIONI KUNDËR KRIMIT TË ORGANIZUAR, ARRESTOHEN 9 PERSONA
Prishtinë, 01 korrik 2026- Operacioni policor kundër krimit të organizuar, i udhëhequr nga Prokuroria Speciale dhe Drejtoria për hetimin e Krimeve të Rënda dhe Krimit të Organizuar në Policinë e Kosovës, me asistimin e Doganës dhe Administratës Tatimore të Kosovës, ka rezultuar me arrestimin e 9 personave.
Bazuar në urdhrin e Gjykatës Themelore në Prishtinë, janë kryer kontrolle në 21 lokacione.
Gjatë zbatimit të urdhërkontrollit është gjetur dhe sekuestruar:
· 15 mijë euro;
· 5 vetura;
· 5 autobot për transport të derivative;
· 2 armë zjarri;
· 54 fishekë;
· Pajisje elektronike;
· Dokumente të ndryshme dhe prova të tjera relavante për rastin
301 euro në kartëmonedha prej 2 eurosh, të cilat dyshohet se janë të falsifikuara.
Në këtë operacionin policor kanë marrë pjesë njësitë relevante të Policisë, Doganës dhe ATK-ja.
Hetimet e përbashkëta kanë çuar në arrestimin e F.M., F.M., M.M., S.K., N.B., D.M., A.M., N.M., dhe G.Q., të cilët dyshohen për kryerjen e veprave penale:
· Shpëlarje e parave;
· Kontrabandimi I mallrave në bashkëkryerje;
· Pjesëmarrja ose organizimi i grupit kriminal të organizuar;
· Dokumentet e rrejshme lidhur me tatimin dhe
· Shmangie nga tatimi.
Ky operacion është zhvilluar në kuadër të veprimeve procedurale hetimore. Pas grumbullimit të informacioneve dhe sigurimit të provave, është krijuar dyshimin e arsyeshëm se të arrestuarit kanë vepruar si grup i strukturuar kriminal, duke paraqitur dokumenteve të rreme lidhur me tatimet, si dhe duke realizuar shitje dhe transaksione fiktive të derivateve të naftës.
Sondazh
Lexo gjithashtu
