Mes tensionesh u zhvillua protesta e ditës së djeshme, ku përplasjeve nuk u shpëtuan as gazetarët. Më konkretisht ka qenë gazetari i Top Channel Muhamet Veliu i cili është cënuar fizikisht nga protestuesi i arrestuar tashmë, Arbër Lleshaj. Dhe po ashtu gazetarja e Top Neës, Kleida Muka u u sulmua nga disa protestuese të cilat filluan ta shtyjnë dhe lagin me ujë.
Në lidhje me këtë është bëbrë një reagim nga Asosacioni i Gazetarëve të Shqipërisë, i cili përmes një deklarate publike ka dënuar sulmin fizik dhe pengimin e ushtrimit të detyrës.
Po ashtu AGSH ka bër ëme dije se kanë qenë edhe disa operatorë dhe gazetarë të tjerë të televizioneve të tjera që janë dhunuar fizikisht ose janë penguar të kryejnë detyrën gjatë protestës.
“Asociacioni i Gazetarëve të Shqipërisë (AGSH) dënon me forcë të gjitha aktet e dhunës dhe pengimit të gazetarëve gjatë protestës së zhvilluar më 2 korrik në Tiranë, pavarësisht se nga kush janë kryer”, deklaron Asosacioni i Gazetarëve.
Deklarata e plotë
Asociacioni i Gazetarëve të Shqipërisë (AGSH) dënon me forcë të gjitha aktet e dhunës dhe pengimit të gazetarëve gjatë protestës së zhvilluar më 2 korrik në Tiranë, pavarësisht se nga kush janë kryer.
Sipas raportimeve të mbledhura nga AGSH dhe pamjeve të dokumentuara, gazetari i Syri TV, Fatjon Gjinaj, është dhunuar nga punonjës të Policisë së Shtetit dhe penguar gjatë ushtrimit të detyrës. Gjithashtu, janë cenuar fizikisht fotoreporteri i ATSH-së, Andrin Hoxha të cilit i është tentuar t’i merret aparati dhe penguar në punë, si dhe fotoreporteri i NurPhoto, Vlasov Sulaj, gjatë ushtrimit të detyrës së tyre.
AGSH i bën thirrje Agjencisë së Mbikëqyrjes Policore (AMP) të nisë pa vonesë hetime të plota dhe të pavarura për sjelljen e efektivëve të Policisë së Shtetit ndaj gazetarëve dhe të mbajë përgjegjës çdo punonjës policie që ka ushtruar dhunë ose ka penguar punën e medias.
Po ashtu, dënojmë edhe sulmet e protestuesve ndaj gazetarëve. Sipas informacioneve të bëra publike dhe të verifikuara nga AGSH, protestuesi Arbër Lleshaj ka cenuar fizikisht gazetarin e Top Channel, Muhamet Veliu gjate ushtrimit te detyrës.
Ndërkohë, gazetarja e Top Neës, Kleida Muka, është penguar dhe është cenuar fizikisht nga protestues të paidentifikuar gjatë një raportimi të drejtpërdrejtë.
Gjithashtu, sipas njoftimit të Ora Neës, protestues kanë penguar dhe kanë cenuar fizikisht ekipin e televizionit, gazetarin Bekim Bici dhe operatorin Atilio Bleta, ndërsa televizioni ka deklaruar se personat e përfshirë kanë qenë pjesëtarë të partisë “Shqipëria Bëhet”.
AGSH i kërkon Policisë së Shtetit të identifikojë dhe të vërë përpara përgjegjësisë ligjore të gjithë autorët e sulmeve ndaj gazetarëve dhe punonjësve të medias.
Asociacioni i Gazetarëve të Shqipërisë rithekson se siguria e gazetarëve, fotoreporterëve dhe punonjësve të medias dhe e drejta për të raportuar lirshëm janë elemente themelore të lirisë së medias dhe të së drejtës së publikut për t’u informuar. Çdo akt dhune apo intimidimi ndaj tyre është i papranueshëm dhe duhet të hetohet e të ndëshkohet pa asnjë përjashtim.
Sondazh
Lexo gjithashtu
